Малум тирвал, алатай йисан 23-декабрдиз Дуствилин кIвале Дагъустандин Кьилин везифаяр вахтуналди тамамарзавай Владимир Васильева республика вилик тухунин ва цуьк акъудунин кардик лайихлу пай кутур дагъустанвияр тебрикнай ва абурув гьукуматдин шабагьар (наградаяр) вахканай.
Культурадин хиле лап хъсан нетижаяр къазанмишунай шабагьриз лайихлу хьайибурун жергеда Дербентда кардик квай Дуьньядин культурайрин ва динрин тарихдин музейдин директор Диана Гьасановани хьунал вири дербентвийри гьахълудаказ дамахзава. Адав В.Васильева тIвар кхьенвай сят вахкана.
РикIел хкин: къадим шегьердин музейрин комплексда жегьилди тир и музей Дербентдин 2000 йисан юбилейдихъ галаз алакъалу яз 2014-йисан эхирра ачухайди я.
Вич арадал атайдалай инихъ алатнавай са акьван гзаф тушир вахтунда ина тарихдин, этнографиядин, динар чирунин, культурологиядин ва искусствоведенидин бинейраллаз хейлин кIвалах кьиле тухвана ва и кар гилани давамарзава. Дуьньядин халкьарин, гьа жергедай яз лезги халкьдин медениятни пропаганда авуниз кьетIен фикир гузва. Музейда мукьвал-мукьвал шаиррихъ, манидаррихъ, композиторрихъ галазни гуьруьшар тешкилзава. И барадай СтIал Сулейманан, Кьуьчхуьр Саидан яратмишунриз талукьарна, Лезги театрдин актеррихъ галаз кьиле тухвай мярекатар рикIел аламукьдайбур хьана.
Нариман Къарибов
