Чи ватанэгьлияр — гьар сана
Вичин тIвар фадлай дуьньяда машгьур хьанвай лезги спортсменрикай сад хейлин турнирра, чемпионатра агалкьунар къазанмишнавай тайский боксер, кикбоксер Жабар Аскеров я. WMC версиядай адакай тайский боксдай пешекар пагьливанрин арада Европадин чемпион хьана.
Жабар Мегьамедовичан ери-бине Кьурагьай я, ина ам 1986-йисан 26-январдиз дидедиз хьана. Ругуд йисан яшда авай аял яз, Мегьарамдхуьре ам дзюдодал машгъул хьунив эгечIна. Жабаран 9 йис тирла, адан хизан Дербентдиз куьч хьана. Спортдал гзаф рикI алай жегьилди гуьгъуьнлай муай-тайдин мектебда вердишвилер къачуна. 2005-йисуз кьисметди ам Таиланддиз акъудна. Са кьадар вахтунда ада ОАЭ-дин (Сад хьанвай Арабрин Эмиратар) патай жуьреба-жуьре акъажунра иштиракна. Алай вахтунда пагьливан Австралиядин Мельбурн шегьерда яшамиш жезва, спортдин рекьяй вичин лигимвал мадни мягькемарзава, Россиядин патай чемпионатра иштиракзава.
2015-йисуз Татарстан Республикадин жемиятдин деятелрин союздин президиумдин къарардалди Ж.Аскеров “Жемиятдин вилик лайихлувилерай” медалдалди къейдна.
2010-2021-йисара ада, гьар йисуз агалкьунралди кьуд бягьс кьиле тухуналди, TNA-дин къайдайрин чемпионатда чемпионвилин тIвар къачуна. И йисара ада, вич руьгьдин, алакьунрин, тежрибадин, къуватдин жигьетдай вичихъ галаз финалдиз экъечIай машгьур пагьливанрилайни зурба тирди успат авуналди, лезги халкьдик дамахдин гьиссер кутуна.
2012-йисан февралдиз IAKSA версиядай пешекар спортсменрин арада Жабар Аскерова Европадин чемпионвилин тIвар къачуна. А чIавуз чи ватанэгьлиди вичихъ галаз бягьсиниз экъечIай спортсмен кьвед лагьай раундда гьасирдал ярхарна. 2012-йисан эхирда кьурагьви пагьливандихъ мад са важиблу агалкьун хьана — Махачкъалада К-1 къайдадин какахьай женгерай немс Энрике Келемахъ галаз кьиле тухвай бягьсинин нетижада судьяйри Жабаран гъалибвал малумарна.
2013-йисуз какахьай женгерай Краснодарда кьиле фейи “Теch-KREP FC I: ЮЖНЫЙ ФРОНТ” турнирдин кьилин вакъиадиз элкъвей, вичин ери-бине Мароккодай тир Могьаммед Медгьарахъ галаз тухвай бягьсни Жабар Аскерова гъалибвал къачуналди акьалтIна.
2013-йисан эхирдай “Tech-KREP FC: ЮЖНЫЙ ФРОНТ 2” турнирдани Аскерова вичихъ галаз бягьсиниз экъечIай спортсмендиз викIегьвал къалурдай мумкинвал ганач, 3-раунддин нетижада судьяйри чи ватанэгьлидин лайихлу гъалибвал малумарна.
Гьелбетда, датIана машгьур акъажунра пешекар пагьливанрихъ галаз женгер тухузвайбурухъ гагь-гагь магълубвилер хьунни тIебии кар я. 2019-йисан августдиз Азиядин спортдин тешкилатди кьиле тухвай акъажунра Ж.Аскеров С.Саньедиз кумукьна.
Жабаран агалкьунар анжах инал къейднавай бязи гъалибвилерикай ибарат туш. Ам къизилдин, гимишдин гзаф кьадар медалрин, чемпионвилин чIуларин сагьиб я.
Дагъвидин руьгь къалурзавай ватанэгьлидихъ гележегдани чIехи гъалибвилерин рехъ агалкьунралди давамардай мумкинвилер, къуватар хьурай!
«Лезги газет»
