14-мартдиз Москвада тайский боксдай жаванрин арада кьиле фейи ачух турнирда ЦФО-дин хейлин шегьеррин спортсменри иштиракна, гьа жергедай яз Тулада яшамиш жезвай чи ватанэгьли, вичин ери-бине Докъузпара райондин Къалажухрин хуьряй тир Агьмед Сейфедовани.
А.Сейфедован 15 йис я, сифтедай ам самбодал машгъул жезвай. Алай вахтунда ада Тула шегьерда “Восток” тIвар алай спортдин клубда, тренер, ушу-саньдадай спортдин мастер, тайский боксдай мастервиле кандидат, вичин ери-бине Хачмаз райондай тир чи ватанэгьли Фарид Шагьбазован гъилик вердишвилер къачузва.
Тайский боксдай Агьмеда сифте яз турнирда иштиракна, къазанмишнавай сад лагьай гъалибвили адан камар мягькембур, чIехи агалкьунрихъ тухудайбур хьунин умудар гузва. Къуй адахъ идалай кьулухъни анжах гъалибвилер хьурай!
К.КIелетви
