Кьурагь районда коронавирусдиз акси рапар язавайбурун кьадар йикъалай-къуз гзаф жезва. “Лезги газетдиз” муниципалитетдин администрациядин пресс-къуллугъди хабар гайивал, алатай йисан 1-апрелдилай коронавирус квани, квачни тайинарун патал 6906 ахтармишун кьиле тухвана ва азар акатнавай 218 дуьшуьш винел акъудна.
Алай вахтунда райондин кьилин духтурханадин инфекцийрин отделенида коронавирус ва я стIалжем квай са азарлудини авач. 4 кас кIвалин шартIара духтуррин гуьзчивилик ква.
Къейд ийин хьи, Кьурагь районда коронавирусдиз акси рапар яна кIанзавай 3720 кас ава. Къенин юкъуз абурукай 200 касди рапар янава. Абурун арада муниципалитетдин администрациядин, медицинадин къуллугъчияр ва жергедин агьалияр ава.
«Лезги газет»
