Алатай йисан эхирра коронавирусдин тIегъуьндик чи арадай Махачкъаладинни Каспийскдин арада авай “Ветеран” поселокда кардик квай имам аш-Шафиидин тIварунихъ галай мискIиндин имам, алим Тажидин Къазибегов акъатна. Лезги жемятдиз Тажидин муаллим чIехи арифдар, математик, таржумачи, диндар, гьамиша илимдал машгъул хьайи инсан яз чидай. Аллагьдин рагьмет хьурай адаз. Амин.
Лагьана кIанда, “Ветеран” поселокда мискIин ахъайна гзаф вахт туш. РикIел хкин, ам эцигунин кIвалахрин кьиле акъвазайбур чи халкьдин жумарт рухваяр я. Алай вахтунда мискIин кардик акатнаватIани, дараматда ремонтдин кIвалахарни давам жезва.
МискIиндин кьилин везифайрикай сад чи халкь диндал мягькемарун, инсанрин рикIел Аллагь гъун, мергьяматлувал ва стхавал хуьн я. Имам аш-Шафиидин мазгьабдал бинеламиш хьана, адан къанунрал, къайдайрал амал ийиз, мискIиндин жемятди, кьиле Тажидин муаллим аваз, диндин рехъ тухузвай.
Тажидин муаллим чи арадай акъатайдалай гуьгъуьниз мискIиндин жемятдин вилик цIийи имам хкягъунин месэла акъвазна.
Къейд ийин хьи, имам мискIиндин сад лагьай даях я. Имамди мискIиндин вири кIвалахар идара ийизва, кьиле тухузва, вичелай аслу крар гьялзава. Имамдиз Шариатдани вичиз талукь кьетIен тегьер, чка ава. Ислам динда имам чIехи дережа авай кас я, адалай амайбуру чешне къачузва, дикъетдивди яб гузва ва адан гафар гьисабдиз къачузва. Имамди жемятдихъ галаз санал кпIар ийизва, азан гузва, акьалтзавай несилдин векилар дуьз рекьелай алатна, “терроризм”, “экстремизм” тIегъуьнрин таъсирдик акат тавун патал абуруз тербиядин тарсар гузва. Гьаниз килигна, имам вири жемятдин, халкьдин арада гьуьрмет авай кас хьана кIанда.
Гьелбетда, винидихъ гъанвай вири ерийрихъ галаз кьазвай кас жагъурун регьят кIвалах туш. Ахьтин инсанар чи арада, якъин я, са акьван гзафни авач.
Гьа икI, са кьадар меслятар, веревирдер авурдалай кьулухъ жемятди и жавабдар къуллугъдал халис диндар, мискIин эцигунин карда мергьяматлувал къалурай Агъамиран хва Жейгьун Агьмедов хкяна. Адан кандидатура алай йисан 18-январдиз Дагъустандин муфтиятдини тестикьарна.
Ж.А.Агьмедов 1975-йисан 6-февралдиз КцIар райондин КIелетрин хуьре дидедиз хьана. Мектебдилай кьулухъ Москвада юридический институт акьалтIарна. Исятда Махачкъала шегьерда яшамиш жезва.
МискIиндин жемятди цIийи имамдик еке умудар кутунва ва Аллагьдин дин хуьнихъ галаз алакъалу яз ийизвай кIвалах ада чешнелудаказ кьиле тухудайдан чIалахъ я. Жейгьун Агьмедова вилик йисара лезги миллетдин векилар гьаждал финин кардик вичин лайихлу пайни кутуна. Адахъ акьалтзавай несилдихъ галаз кIвалахдай, жаванриз дуьз тербия гудай тежрибани ава. Ам вичин везифайрив жавабдарвилелди эгечIнава.
Къуй Аллагьди адаз тавфикъ ва Вичин разивал гурай.
«Лезги газет»
