Лезги кьегьал рухвайри чи районрин, республикадин дережадин ва адалай къецени кьиле физвай спортдин майданра чпин устадвал къалурунал, гъалибвилер къазанмишунал чна дамахзава. Абурукай газетдин гьар са нумрада хабар гузни чна тади къачузва. Чи ватандашрикай бязибурукай газетда мукьвал-мукьвал макъалаяр акъатзава, садбурун сифте камар чна раижзава.
Къе вичикай муштулух ганвай ватандаш Мегьамедвели Халикьовакай — Росгвардиядин Дагъустан Республикада авай Управленидин вневедомственный охранадин кьилдин батальондин къуллугъчидикай, полициядин сержантдикай, къуватлу гъилерин сагьибдикай — газетда чна идалай виликни кхьейди я. И йикъара Каспийскда, Къурамегьамед Къурамегьамедован тIварунихъ галай спортдин комплексда, армрестлингдай кьиле фейи Дагъустандин чемпионатда республикадин жуьреба-жуьре пипIерай атанвай 100-лай виниз спортсменри иштиракна. Мегьамедвелиди (90 кг-дал къведалди заланвал авайбурун арада) и чемпионатда 1-чка кьуна. Гила ам Дагъустандин чемпионвилин тIварцIиз 9-сеферда лайихлу хьанва. Аферин!
М.Халикьов 1992-йисуз Къизляр райондин Сарсар хуьре (ина асул гьисабдай Кьурагь райондин Ашарин хуьряй куьч хьанвай агьалияр яшамиш жезва) дидедиз хьана. Адан имияр Насир ва Назир Халикьовар армрестлингдай машгьур спортсменар я (абур кьведни Россиядин чемпионвилин тIварариз лайихлу хьана. Насир Халикьов лагьайтIа, кьве сеферда дуьньядин чемпионни я), гъвечIи чIавалай абурун бягьсериз килигзавай, гъилерин къуватрал гьейранвалзавай гадади спортдин и жуьреда вичин къуватарни ахтармишиз эгечIна. Аквазвайвал, хъсан нетижаярни къазанмишзава. Дагъустандилай къецени адакай спортдин и жуьредай Вирироссиядин турниррин призер хьана. Ам армрестлингдай спортдин мастер я.
Лугьун лазим я хьи, армрестлингдилай гъейри, чи ватандаш боксдал (боксдай спортдин мастервиле кандидат я) ва грэпплингдални машгъул жезва.
Гила Мегьамедвелиди нубатдин акъажунриз — Орел шегьерда армрестлингдай кьиле фидай Россиядин чемпионатдиз гьазурвал аквадайвал я. Къуй ам анайни гъалиб хьана хтурай!
Рагнеда Рамалданова
