Вири дуьньядин дидед чIа-ларин йикъаз талукьарна, Мегьарамдхуьруьн райондин Бут-Къазмайрин культурадин кIвале «Рекьимир чIал!» лишандик кваз мярекат кьиле фена. Аниз аялар, школадин муаллимар ва хейлин диде-бубаярни атанвай.
Хуьруьн юкьван школадин дидед чIаланни эдебиятдин муаллим Букарова Фатума Казумовнадин регьбервилик кваз тешкилай мярекатда сад, кьуд, ругуд, муьжуьд ва кIуьд лагьай классрин аялрини иштиракна. Алирза Саидован, Фейзудин Нагъиеван, Ханбиче Хаметовадин, Арбен Къардашан, Абдулфетягьан, Желил Мурадалиеван ва маса бажарагълу шаиррин чIалакай кхьенвай шиирар кIелна. Абуру гьакI чпихъ сегьнеда къугъунин устадвилин бажарагъ авайдини къалурна. Исмихан Къадимован «Вот, юлдашар» шиир, Абдулбари Магьмудован «Туьтуькъуш» гьикая, Байрам Салимован»Асиятан жалоба» шиир сегьнеламишна, хуьруьн культурадин кIвалин регьбер, «Дагъустандин руьгь» ва маса фестивалринни килигунрин гъалибчи Мегьамедов Айдуна чуьнгуьрдал тамамарай авазрихъ галаз манияр лагьана, кьуьлерна.
Мярекатдиз атанвай мугьманри аялриз, муаллим Фатума Казумовнадиз тарифдин келимаяр ва аферин лагьана.
Дугъриданни, Ф.Букарова вичин пешедиз вафалу муаллим я. Ада тарсарилай къецяй аялрихъ галаз датIана алава кIвалах тухузва, дидед чIал кIанарзава. Ахьтин муаллимар амай кьван чи чIал садрани квахьдач.
Тамила Салманова
