Мукьвара чав  Мансур  Куьревиди  Етим Эминакай цIийи ктаб акъуднава лагьай хабар агакьна.

Шаирдин эсерар кIватI хъувун, абур кIелзавайбуруз ачухарун патал Куьреви Мансурал къве­далди гзаф маса ксарини чалишмишвилер авунай, гьелбетда. Гьар са касдини, Е.Эмин хайи, кьейи йисарикай, чкадикай ра­хадайла, вичин фикир тес­ти­кьа­риз алахънай. Эхирни Е.Эмин 1838-йисуз хайиди ва 1884-йисуз кьейиди, хайи чкани Ялцугъар яз кьабулнай.

Кьабулнай! ГьакI хьана фенай! Етим Эмин мус ханай, мус кьенай ва гьина ханай — рахунрикай чаз вуч ава, ам вири лезгийрин шаир я лугьудайбурни майдандиз акъатнай.

Чахъ Етим Эмин хьиз, лу­гьун­ чна, урус халкьдихъ чпин А.С. Пушкин ава. Амма адахъ (урус халкьдихъ) чпин классик мус хана, гьина хана, мус кьена лу­гьудай гафар авач! Урус халкь­диз Пушкинахъ галаз ала­къалу гьар са затI багьа я. Гьар са затIу­низни лайихлу къимет гун хас я.

Эминал хквен. Адан яратмишунрал машгъул хьайи сада заз са чIавуз ихтилат кватай чкадал икI лагьанай: “Етим Эмина вичин гъилелди кхьенвай са затIни садахъни авач. Адан вири малум тир затIар инсанрин сиверай, бязи кIел-кхьин чидай ксарин гъилин хатIарин дафтаррай кIватI хъувунвайбур я. Зани жуван ахтармишунра Е.Эминан шиирар жува гьикI кьатIузва­тIа,гьикI гьиссзаватIа, гьакI “дуьзар” хъувуна къалурнава. Туш­тIа, зун гьахъ туш лугьудайбур майдандиз экъечIрай…”.

Къе чахъ Эминар гзаф хьанва: Гьаким Къурбанан, Фейзудин Нагъиеван, Арбен Къардашан, Гъалиб Садикъидин… Эмин, Эмин, Эмин… Гила ингье Куьре­ви Мансуран Эминни!

Амма гьа­къи­къатдин Эмин вуж тиртIа яраб?!

Сабир Эфендиев