18-февралдиз Республикадин этнический культурайрин центрада Дагъустандин милли чIалар хуьнин ва виликди тухунин месэлайриз талукь “элкъвей стол” тешкилнавай.
Мярекат РД-дин милли политикадин ва динрин крарин рекьяй министр Энрик Селимович Муслимова ачухна ва кьилени тухвана. Ада республикада милли чIалар, культураяр, адетар хуьнин, ахтармишунин, виликди тухунин крариз вири обществоди кьетIен фикир гузвайди, ятIани хейлин четинвилер, гъиляй акъатзавай ивирар авайди къейдна. КIватI хьанвайбуруз а месэлаяр веревирд авун ва тайин тир рекьер къалурун теклифна.
Мярекатдал метлеблу рахунар инсандин ихтиярар хуьнин ва гражданвилин общество виликди тухунин рекьяй РД-дин Кьилин патав гвай Советдин председатель З.З.Ильясова, РАН-дин ДНЦ-дин тарихдинни археологиядин ва этнографиядин Институтдин илимдин кьилин къуллугъчи, илимрин доктор М.М.Мегьамедханова, ИЯЛИ-дин грамматикайрин рекьяй ахтармишунрин отделдин заведующий М.А.Мегьамедова, ДГУ-дин филологиядин факультетда хайи чIалар чирунин центрадин директор М.А.Гьасановади, масабуру авуна.
Аспирантка М.А.Ибрагьимовади вичи гьазурнавай “Дидед чIаларин аудиоктабдин” (“рахазвай ктабдин”) презентация кьиле тухвана.
Рахай вирибуру кьадардиз тIимил тир вири халкьарин чIалар хуьнин гьал къурхулувилик квайди, хайи чIаларал рахазвайбурун, кIелзавайбурун, кхьизвайбурун кьадар къвердавай тIимил жезвайди къейдна. ЧIал хуьзвай сад ла-гьай ужагъ хизан, ахпа аялрин бахчани мектеб хьуниз килигна, обществодин вири къатара хайи чIалар чирунин, абурал рахунин, несилри сада-садал агакьарунин рекьерикай чпин фикирар лагьана, теклифар гана…
* * *
19-февралдиз ДГУ-дин ректоратдин конференц залда филологиядин факультетдин алимрихъ ва студентрихъ галаз тешкилай гуьруьшни винидихъ раханвай месэлайриз талукьарнавай. Иниз Дагъустан Республикадин информациядин ва печатдин министр Умаросман Гьажиев, СМИ-рин редакторар, илимдинни общественностдин хейлин векилар, студентар атанвай.
Мярекат филфакдин декан, илимрин доктор Ш.А.Мазанаева ачухна, гаф министр У.Гь.Гьажиеваз гана.
Ада алай аямда чи милли СМИ-яр авай гьалдин, аниз кIвалахал къвезвай пешекаррин, кхьизвай материалрин ва маса месэлайрин гьакъиндай суьгьбетна, милли журналистикадин вилик акъвазнавай гзаф месэлайрикай вичин фикирар лагьана, гьалар четинбур, кIевелай къурху кутазвайбур тирди къейдна. Милли СМИ-яр квахьайтIа, чIалар хуьнин крар генани кIеве гьатда. Квахьда чIаларни, культурадин ивирарни… Гьавиляй кьетIен программаяр веревирдна, государстводин дережада вилик эцигун чарасуз я.
Чпин фикирар мярекатдал профессор Ш.А.Мазанаева, РД-дин Кьилин патав гвай махсус Советдин векил З.З.Ильясова, ДГУ-дин филфакдин Дагъустандин чIаларин кафедрадин заведующий М.Р. Багамаева, РД-дин журналистрин Союздин председатель А.А.Камалова, журналистикадин отделенидин преподаватель Гь.А.Мегьамедова ва масабуру лагьана.
Мердали Жалилов
