И йикъара 96 йисан яшда аваз РСФСР-дин лайихлу юрист, 1962-1970-йисара ДАССР-дин Верховный Суддин председателвиле, юстициядин министрдин заместителвиле кIвалахай ДГУ-дин профессор Али Абутрабович Аливердиев рагьметдиз фена.
А. Аливердиев 1925-йисуз Самур округдин Ахцегьрин хуьре дидедиз хьана. 1943-йисан сентябрдиз жегьил ВЛКСМ-дин райкомдин кьвед лагьай секретарвиле хкяна. И чIавуз ам ВКП(б)-дин жергейризни гьахьна. Адал Ахцегь райисполкомдин кадрийрин сектордин заведующийвилин, партиядин райкомдин инструкторвилин везифаярни ихтибарна. Дяведин йисара ДАССР-дин НКВД-дин райондин отделдин тапшуругъдалди диверсантрихъ, дезертиррихъ галаз женг чIугвазвай истребительный батальонда къуллугъна. Гуьгьуьллувилелди фронтдиз фена. Хурудал “Кавказ хуьнай” медаль алаз хтана, дяведилай гуьгъуьниз Дагъустандин областной партийный школада кIелна. 20 йисавай коммунист ВКП(б)-дин Дагъустандин обкомдин инструкторвиле кIвалахал кьабулна.
Ленинграддин госуниверситетдин юридический факультет акьалтIарна, Яру диплом къачуна хтай Али Аливердиев 1952-йисуз ДАССР-дин юстициядин министрдин заместителвиле тайинарзава ва ада вич кар алакьдай, вини дережадин пешекар тирди къалурзава.
Гуьгъуьнин йисара адал ДАССР-дин Верховный Советда, Дагъустандин обкомда лап жавабдар къуллугъар ихтибарзава. 1962-йисуз Али Абутрабович ДАССР-дин Верховный Суддин председателвиле хкязава. И къуллугъдал адан бажарагълувал тамамвилелди ачух хьана. Вичин чирвилерни хкажиз, ада республикадин вузрин студентризни юриствилин рекьяй тарсар гана, печатдин изданийриз гзаф кьадар макъалаяр акъудна, кандидатвилин диссертация хвена. Ада неинки республикада, гьакI уьлкведани авторитет къазанмишна.
Али Абутрабовича 1977-йисан СССР-дин Конституция гьазурунин кардани, менфятлу теклифар гуз, иштиракна. Хейлин йисара ада Махачкъала шегьердин юридический отделдин начальниквиле, меркездин мал-эменнидал гуьзчивалдай комитетдин председателвиле кIвалахна. Гьа са вахтунда ДГУ-да административный ва чилерин праводин рекьяй лекцияр кIелна. Ада 50-далай виниз илимдин кIвалахарни кхьена.
2010-йисуз А. Аливердиев “Санкт-Петербургдин машгьур ксар” энциклопедияда гьатна ва адаз “Личность Петербурга” къизилдин медаль гана.
“Лезги газетдин” редакциядин коллективди Али Абутрабовичан хизанриз ва мукьвабуруз башсагълугъвал гузва. Аллагьди рагьметрай вичиз!
