Ихьтин лишандик кваз чи ватандаш Займудин Семедова тамам 3 юкъуз давам хьайи марафондин нетижада 370 км мензилдиз чукурна. Марафондин иштиракчини, гьа са вахтунда тешкилатчини тир кьезил атлетикадал машгъул ада Докъузпара райондин дагълух Къурушдилай Хасавюрт райондин ЦIийи Къурушдал кьван рехъ атIана. Макьсад спорт, физический культура машгьурунихъ галаз сад хьиз, Дагъларин уьлкведин гадарнавай хуьрерал — бубайрин ватанрал чан хкунни я.
Марафондин 25-километрда, Докъузпара райондин Усугъчайдал, спортсмендихъ галаз райондин спортдин, жегьилрин политикадин ва туризмдин отделди тешкилай гуьруьшдал ам Докъузпара райондин кьилин везифаяр вахтуналди тамамарзавай Мегьамед Шамилова, администрациядин кьилин заместитель Салигь Гьажимурадова, волонтерри, общественностдин векилри ва жегьилри къаршиламишна. Займудин Семедова кIватI хьанвайбурун тIварцIихъ хуш келимаяр лагьана ва марафондикай, адан макьсаддикай куьрелди суьгьбетна.
— За текдаказ иштиракзавай и марафон ДАССР-дин виш йисан юбилейдиз бахшнава. Квез чизвайвал, чи ватандаш, ДАССР арадал атунин чешмейрив хьайи Дагъустандин ВКП(б)-дин обкомдин сад лагьай секретарь Нажмудин Самурскийдин ери-бине Къурушдилай тир. Идалайни гъейри, къурушвийрин са пай Хасавюрт райондин Къурушдал куьчарна цIи 70 йис тамам жезва. И марафон Къурушрин кьве хуьруьн агьалийрин арада дуствал мягькемарунизни бахшнава. И алакъаяр хуьнихъ, квадар тавунихъ еке метлеб ава, — къейдна ада.
Мегьамед Шамилова спорт вилик тухунай, сагълам уьмуьр пропаганда авунай спортсмендиз сагърай лагьана ва хъсан рехъ хьун алхишна.
— Займудин Семедова акьалтзавай несилдиз ва жегьилриз хъсан чешне къалурзава. Ада вилик макьсад эцигиз ва ам кьилиз акъудиз чирзава. Идалайни гъейри, гьар йикъан къайгъуйрик кваз чна гзаф крариз фикир гузвач. ЧIехи несилдин инсанрихъ галаз суьгьбетардай, абурувай акьул-камал къачудай вахт жагъурун лазим я. Ахьтин ксарни, абуру йисаралди хуьзвай адетарни чаз анжах чи дагълух хуьрерай жагъида. Займудина ихьтин къени ниятар аваз кьилиз акъудзавай макьсадди, атIузвай яргъал мензилди чав чи дувулар авай чкайрикай фикириз тазва. Ида дагълух хуьрерал чан хкунин карда куьмекдайдахъни инанмишвал къалуриз кIанзава, — алава хъувуна ада.
РикIел хкин: им Займудин Семедован 3-марафон я. Икьван чIавалди ада Махачкъаладай Дербентдиз (110 км) ва Махачкъаладин жуьмя мискIиндилай Грозныйдин (“Чечнядин рикI” (кьве юкъуз — 170 км) мискIиндал кьван чукурнай.
«Лезги газет»
