Калашниковав гекъигна
Коронавирусдиз акси Россиядин “Спутник V” вакцина, таъсирлувилизни мягькемвилиз килигна, Калашникован автоматдив гекъигиз жезва. Ихьтин фикир Венадин медицинадин университетдин кьилин пешекар Ф.Тальхаммера “Kronen Zeitung” чешмедиз раижна.
“Россияда арадал гъанвай вакцина Калашникован автомат хьиз я: ихтибарлу, регьят ва таъсирлу”, — лагьана ада.
Алай вахтунда COVID-19 азардиз акси вакцинаяр дуьньяда са шумуд ава. ИкI, “Спутник V” вакцинадилай гъейри, Россияда “Вектор” центрадин патай “ЭпиВакКорона”, Чумакован тIварцIихъ галай центрадин патай “КовиВак” регистрация авунва. Уьлкведа 18-январдилай “Спутник V” дармандин рапар ягъунив эгечIнава. И вакцина дуьньядин гзаф уьлквейрини кьабулнава.
Квахьайбур жагъурзава
Дагълух Къарабахда женгер кьиле фейи вахтунда кьейи ва гел галачиз квахьайбур жагъурунин гьерекатар гьавадин шартIар пис хьуникди акъвазарнава. Идакай “Sputnik Армения” чешмедиз тестикь тахьанвай республикадин ЧС-дин векил У.Тадевосяна малумарна.
Къейдзавайвал, квахьнавайбур жагъурунин кIвалахар са тIимил йикъарилай давамар хъийида. Идалай вилик ихьтин гьерекатар са шумуд юкъуз кьилиз акъуднава. Нетижада 1485 инсандин амукьаяр жагъанва, абурук аскерар ва жергедин агьалияр акатзава.
Дагълух Къарабахда алатай йисан 27-сентябрдилай дяве башламишнай. 9-ноябрдиз Россиядин, Эрменистандин ва Азербайжандин регьберри женгер акъвазарунин гьакъиндай умуми икьрардал къулар чIугуна.
Къуватлу авуникай фикирзава
Эрменистандиз Гуьмрида авай Россиядин 102-база гегьеншариз ва адан мумкинвилер артухариз кIанзава. Идакай республикадин оборонадин министр В.Арутюняна “Новости” РИА-диз малумарна.
Ада алава хъувурвал, Россиядин оборонадин министерстводи регионда авай военный ва сиясатдин гьалар фикирда кьунва ва база къуватлу авунин, яракьар артухарунин рекье дуьз камар къачунва.
Алатай йисан эхирда парламентдин оппозициядин “Светлая Армения” фракциядин кьил Э.Марукяна республикадин кьиблепата Россиядин мад са база арадал гъун теклифнай. Исятда Эрменистанда авай Россиядин 102-нумрадин база 1995-йисалай инихъ кардик ква.
Манийвилер давамардайвал я
США-ди “Северный поток-2” газопроводдихъ галаз алакъалу вири тешкилатар дикъетдик кутун хиве кьунва. Идакай госдепдин векил Н.Прайса малумарнава, хабар гузва “Новости” РИА-ди.
Прайса къейд авурвал, Америкадин гьукумдарри проектдин вири иштиракчияр ахтармишда ва мумкин тир санкцияр кардик кутада. Ада газопроводдихъ галаз алакъалу кIвалахра иштиракун чпин “хушуналди” акъвазарнавай 15 тешкилатдин сиягь конгрессдиз къалурнавайдакай ва абур исятда США-дин санкцийрик акат тавунвайдакай лагьана. США-ди “Северный поток-2” газопроводдиз акси санкцияр идалай виликни гегьеншарнай.
“Северный поток-2” Балтийский гьуьлуьн кIаняй Россиядай Германиядиз тухванвай газопровод я. Ам 2019-йисан эхирда ишлемишиз вахкун лазим тир, амма США-ди малумарай акси санкцияр себеб яз, кIвалахар энгеларуниз мажбур хьана. Америкадиз Европада чпин тIебии газ вилик жергейрик кутунин ниятар ава.
Алай вахтунда “Северный поток-2” проект 95 процентдин тамамарнава.
ВОЗ-дин цIийи малумат
ВОЗ-дин Европадин региондин бюродин кьил Х.Клюгеди коронавирусдин азардин тIугъвал 2022-йисан сифте кьилера куьтягь жеда лагьанва. Даниядин DR телеканалдин делилрал асаслу яз, идакай “Новости” РИА-ди хабар гузва.
“Лап пис гьалар алатнава. Исятда чаз вирусдикай хабар хьанва”, — лагьана ада. Алава хъувурвал, инсаниятдин арадай вирус михьиз квахьдач, амма къалурнавай муддатда ам хейлин яваш жеда. Им анжах виликамаз раижзавай фикир я. Коронавирусдин гьалар гележегда гьикI жедатIа, дуьм-дуьздаказ садавайни лугьуз жедач.
Малум тирвал, алай вахтунда коронавирус акатайбурун кьадар дуьньяда 110 миллиондилай алатнава.
«Лезги газет»
