Сулейман-Стальский районда дидед чIалан суварин сергьятра аваз медениятдиз, хайи чIалаз талукьарна са жерге конкурсар, мярекатар кьиле фена. КТВ-дин кьилин редактор Эльвира Небиевади райондин образованидин управленидихъ галаз санал тешкилай “Хайи чIалан гьамга булах” конкурс иллаки итижлуди хьана. Адан кьетIенвал адакай ибарат тир хьи, лезги шаирри кхьенвай шиирар кIелунин онлайн-флэшмобда анжах 3-7 йис тамам хьанвай бицIекри иштиракна.
Лагьана кIанда, гъвечlи аялрин арада и жуьредин конкурс цIи сифте яз кьиле фена. Аялриз гъвечIизамаз хайи чил, хайи чIалан гаф кIанарунин, шиирар хуралай кIелунин жигьетдай абурун алакьунар вилик тухунин макьсаддалди кьиле тухвай конкурс гзафбуру хушдиз кьабулна.
Сулейман-Стальский райондин администрациядин Инстаграм-аккаунтдин куьмекдалди кьиле тухвай конкурс 10-февралдилай 15-февралдалди давам хьана. Санлай къачурла, 55 аялди иштиракна.
Гъалибчидизни хъсан чкаяр кьурбуруз Имам Яралиеван мергьяматлувилин “Умуд” фондунин патай пулдин пишкешар гана. 1-чка райондин ЦIийихуьряй тир, пуд йисан яшда авай Амира Наврузбеговади кьуна (10 агъзур манат), 2-чка — Курхуьряй тир, вад йиса авай Арина Абдуллаевади (7 агъзур манат), 3-чка — ЦIийихуьряй тир, кьуд йиса авай Сафия Цмихановади (5 агъзур манат).
Идалайни гъейри, конкурсда иштиракай вири аялриз шагьадатнамаяр ва гьар садаз агъзур манатдин пишкеш гана.
Лезги Фетгьуьллагь
