Дуьньядин халкьарин хайи чIаларин йикъахъ галаз алакъалу яз виринра жуьреба-жуьре мярекатар кьиле физва. “Лезги газетдин” редакциядини дидед чIалан суварик еке пай кутазва. Редакцияди гьар йисуз тешкилзавай олимпиада аялрин арада хайи чIал машгьурунин, акьалтзавай несилриз хайи меденият кIанарунин макьсаддалди тешкилзавай хъсан серенжемрикай садаз элкъвенва. ЦIинин олимпиада “Лезги газетдин” 100 йисаз талукьарна.
18-февралдиз Махачкъала шегьердин 10-нумрадин мектебда тешкилай олимпиадада меркездин ва Каспийскдин мектебра 6-классра кIелзавай 11 аялди иштиракна. Алатай йисарив гекъигайла, цIи иштиракчийрин кьадар тIимил хьана. Чаз малум хьайивал, тIугъвал пайда хьайидалай инихъ бязи мектебра хайи чIалан тарсар онлайн къайдада кьиле физва. И месэладай тамамвилелди чи кьил акъатнач. Хайи чIалан тарсарив и жуьреда эгечIуни вирибурук къалабулух кутун лазим я.
Олимпиададин тапшуругърик лезги чIалазни эдебиятдиз талукь тестер ва пунктуацияни орфография ахтармишдай тест-диктант квай. Аялрин кIвалахриз баллрин куьмекдалди М.Ибрагьимова ва К.Ферзалиева къимет гана.
Нетижада 1-чка Махачкъаладин 38-нумрадин гимназияда кIелзавай Амина Баламирзоевади кьуна (муаллим — Алимат Баламирзоева), 2-чка — Махачкъала шегьердин 61-нумрадин мектебда кIелзавай Эльмира Шихрагьимовади (муаллим — Марифат Эльдарова), 3-чка — Махачкъаладин 48-нумрадин мектебда кIелзавай Эльвира Баламирзоевади (муаллим — Шукуфат Хибиева).
КIвенкIвечивилин пуд чка кьурбуруз 5, 3, 2 агъзур манат пулдин пишкешар, Мансур Куьревидин “Етим Эмин (1840-1880)” ктабар, дипломар гана. Гъалиб хьайи ва хъсан чкаяр кьур аялрин муаллимарни дипломралди къейдна. Олимпиадада иштиракай вири аялриз алай аямдин машгьур шаир Мердали Жалилован цIийи ктабарни пишкешна.
Эхирдай М.Ибрагьимова 10-нумрадин мектебдин директор Рамиз Сердероваз олимпиада тухуник вичин пай кутунай сагърай лагьана.
Чи мухбир
