Сулейман-Стальский райондин администрациядай хабар гайивал, Дагъустандин Автономиядин 100 йис тамам хьунин гьуьрметдай Кьасумхуьруьн майдандал государстводин ва жемиятдин деятель, ВКП(б)-дин Дагъустандин обкомдин 1-секретарь хьайи Нажмудин Самурскийдиз барельеф эцигда. Ам РФ-дин лайихлу художник Шариф Шагьмарданова гьазурна ва райондиз пишкешна. Памятник Санкт-Петербургдай Кьасумхуьрел хканва.
Алай вахтунда ам барельефрин жергеда эцигунин серенжемар кьиле тухузва. Майдандал Къазимегьамед Агъасиев, Сергей Киров, Григорий Орджоникидзе, Оскар Лешинский, Мегьамед Далгат, Гьарун Саидов, Уллубий Буйнакский ва Махач Дахадаев хьтин инкъилабчийриз ва жемиятдинни сиясатдин деятелриз барельефар эцигнава.
Нажмудин Самурскийдиз барельеф эцигунин тапшуругъ Кьасумхуьруьн администрацияди архитектурадинни эцигунрин ва ЖКХ-дин отделдиз ганва.
Нажмудин Самурский Дагъустандин экономика, культура вилик тухунин кьиле хьана. 1934-йисан июндиз Махачкъалада Дагъустандин писателрин 1-съезд эвер ганай. 1937-йисуз Дагъустанда республикадин 5 ва районрин 28 газет, фабрикайринни заводрин ва жуьреба-жуьре хилерин 6 “многотражка” акъатзавай, клубрин къайдадин 723 идаради кIвалахзавай. Гьа йисуз кардик квай 515 библиотекада 250 агъзурдалай виниз ктабар авай.
1933-йисуз Нажмудин Самурскийдикай Дагъустанда сифтебурукай яз тарихдин илимрин кандидат хьана. Адан регьбервилик кваз “Долой неграмотность” общество арадал гъана.
30-йисарин эхирра гзаф законлувал чIурунин нетижада советрин ва партийный работникар жазаламишна. Абурун арада ВКП(б)-дин обкомдин Сад лагьай секретарь Нажмудин Самурскийни авай.
1956-йисуз Нажмудин Самурский гьахълуди яз тестикьар хъувуна. Райондин агьалийри Кьасумхуьрел Нажмудин Самурскийдиз барельеф эцигунин тереф кIевелай хуьзва.
Хазран Кьасумов
