Росстатди Дагъустандин карчийривай, гъвечIи ва юкьван бизнесдин перепись кьиле тухун патал, 2021-йисан 1-апрелдалди электронный анкета ацIурун тIалабзава.
РД-дин экономикадин ва мулкар виликди тухунин министерстводи хабар гузвайвал, и кар кьилиз акъудиз жеда: госкъуллугърин порталдин куьмекдалди (ина касдин тестикьарнавай делилар аваз хьайитIа), Росстатдин интернет-сайтда (электронный рекъемрин къул аваз хьайитIа) ва я электронный документооборотдин операторрин куьмекдалди.
Идарадин векилди къейд авурвал, чарчел ацIурнавай анкета региондин статистикадин идарадиз гъана гъиляй-гъилиз вугудай ва я почтадай рекье твадай мумкинвилерни хвенва.
“Анкетаяр гъвечIи карханаяр ва ИП-яр патал кьилди-кьилди туькIуьрнава. Абур ацIуруни квевай гзаф вахт къакъуддач. Росстатди куьне агакьарнавай делилрин саламатвилиз заминвалзава. Вири делилрикай умумиламишна нетижа хкудда”, — къейдзава идарадин векилди.
РикIел хкин, гъвечIи бизнесдин экономикадин перепись 5 йисалай 1 сеферда кьиле тухузва ва, РФ-дин законодательстводи истемишзавайвал, и карда иштиракун чарасуз я.
Къенин юкъуз чи уьлкведа 75 процент карханаяр ва 15 миллион кас гъвечIи бизнесдин векилар я. Ада уьлкведин экономикадин нетижалувал ва агьалийрин дуланажагъ тайинарзава. Государстводиз гъвечIи ва лап гъвечIи карханаяр, кьилдин карчияр гьикI яшамиш жезватIа, абурун вилик четин гьихьтин месэлаяр акъ-вазнаватIа чир хьун важиблу я. Экономикадин переписдин вахтунда кIватIнавай делилрал бинеламиш хьана государстводин патай куьмек гунин программаяр кардик кутада, къарарар кьабулда, гьисабзава Росстатди.
«Лезги газет»
