Алатай гьафтедин эхирдай Россиядин Федеральный антимонопольный къуллугъдин Дагъустандин Управленида 2020-йисуз кьиле тухвай кIвалахдин нетижайриз талукь пресс-конференция кьиле фена.
Управленидин руководитель Къаир Бабаева республикадин журналистриз хабар гайивал, 2020-йисуз Дагъустандин УФАС-ди, идаради гуьзчивалзавай вири хилера рехъ ганвай гъалатIриз талукь яз, санлай къачурла 192,1 миллион манатдин жермеяр илитIнава. Виридалайни гзаф жермеяр монополийриз акси законодательство чIурунай авунва — 182 миллион манат (2019-йисуз — 48,1 миллион манат). Государстводин закупкайрин хиле рехъ ганвай гъалатIар (закон чIурунар) себеб яз 9 миллион манатдилай гзаф кьадарда аваз (2019-йисуз — 5,2 миллион манат) жермеяр илитIнава.
Малум хьайивал, Россиядин ФАС-дин Дагъустанда авай Управлениди алатай йисан вахтунда, “Базарда гьуьжетунин шартIар хуьнин гьакъиндай» федеральный закон чIурун себеб яз, 125 дело къарагъарнава ( 2019-йисуз — 108). Абурун чIехи пай гьар жуьре дережайрин муниципалитетрин, газдин ва энергетикадин компанийрин аксина къарагъарнавайбур я. Къаир Бабаева къейд авурвал, эгер монополийриз акси законодательство чIурай дуьшуьшар шегьерра асул гьисабдай чилерин участокрин дережа (ишлемишдай ихтияр авай жуьре) дегишарунихъ галаз алакъалу ятIа, районра ихьтин тахсиркарвилериз чилерин участокар киридиз къачудай икьрарар кутIуниз талукь тулкI ийидайла рехъ гузва.
Государстводин закупкайриз талукь яз алатай йисан вахтунда Дагъустандин УФАС-ди 2207 арза гъилелай авунва: жуьреба-жуьре дережайрин закупкайриз талукь тир абурукай 1096 арза бине авачирбур яз, 733 — бине авайбур яз гьисабнава, 148 — УФАС-дин комиссияди элкъуьрна рахкурнава, 230 — арзачийри чпи вахчунва.
ГьакIни, алатнавай девирда “Государстводин ва муниципальный игьтияжар таъминарун патал метягь, кIвалахар ва къуллугъар маса къачунин хиле икьраррин системадин гьакъиндай” федеральный закондал амал тавуна 724 закупка кьиле тухванвай дуьшуьшар винел акъуднава. И хиле рехъ ганвай гъалатIар себеб яз 9,4 миллион манатдилай виниз кьадарда аваз (2019-йисуз — 5,2 миллион манат) жермеяр илитIнава.
Заказчийри рехъ гузвай гъалатIар йисалай-суз гьа сад хьтинбур яз амукьзава:
— информациядин сад тир къурулушда информация къалурдайла рехъ гузвайбур;
— таъминчи тайинардай къайда хкягъуниз талукьбур;
— закупкайрин иштиракчияр хкядай къайда чIуруниз талукьбур;
— икьрар кутIунунин къайда чIуруниз талукьбур.
Эхирдай Къаир Бабаева журналистрин суалриз жавабар гана.
«Лезги газет»
