Алатай гьафтеда Махачкъалада, “Дуствилин КIвалин” Лацу залда, “Государстводин властдин органри ва обществодин гражданвилин институтри коронавирусдин азар чукIун тавун патал сад-садахъ галаз алакъада аваз кIвалахун” темадай тешкилай элкъвей столдихъ коронавирусдин азардиз акси рапар ягъуникай (вакцинация) рахана.
Мярекатда Дагъустандин Общественный палатадин членри, властдин органрин, диндин, коммерциядинбур тушир, общественный тешкилатрин, мергьяматлувилин фондарин векилри, журналистри ва масабуру иштиракна. Ам тешкилнавайди Дагъустан Республикадин милли политикадин ва диндин крарин рекьяй министерство тир.
РД-дин милли политикадин ва диндин крарин рекьяй министрдин везифаяр вахтуналди тамамарзавай Энрик Муслимова къейд авурвал, азардиз акси рапар ягъун гьар са касди вичин хушуналди кьабулзавай къарар я. Амма къенин юкъуз COVID-19 азардин вилик пад кьунал гьалтайла, им виридалайни менфятлу рехъ я, гьикI хьи, рапар ягъуни чи гьар садан, гьакIни чи багърийрин сагъламвални хаталувиликай хкудиз куьмекда.
Дагъустандин Общественный палатадин председатель А.Ибрагьимова азардикай хуьдай, адан вилик пад кьадай вакцина арадал гъайила, адан нетижалувал шаклувилик кутазвай ксар гзаф пайда хьанвайди къейд авунихъ галаз сад хьиз, уьмуьр ва сагъламвал патал важиблу месэлайрай къарар кьабулдайла идан-адан рахунрихъ ваъ, анжах пешекаррин меслятрихъ яб акалуниз эвер гана.
РД-дин здравоохраненидин министерстводин медицинадин рекьяй куьмек гун тешкилдай Управленидин начальник М.Гьасановади къейд авурвал, тIугъвалдин вилик пад кьун патал Дагъустандин саки 60 процент агьалийриз азардикай иммунитет хьун, 700-760 агъзур касди азардиз акси рапар ягъун герек я. Алай вахтунда республикадиз 8 агъзурдалай гзаф доза вакцина агакьнава, мадни 80 агъзур доза февралдин эхирралди ахгакьда. Рапар ягъун патал республикада 54 пункт тешкилнава.
Дагъустандин муфтийдин куьмекчи М.Мегьамедова азардиз акси рапар ягъуникай ислам динда вуч лугьузватIа, гьадакай ихтилатна.
Роспотребнадзордин Дагъустанда авай Управленидин отделдин начальникдин заместитель М.Рамазанова агьалияр азар акатунал гъизвай себебар малумарнавай къайдайрал амал тавунихъ галаз алакъалу тирди лагьана.
Рагнеда Рамалданова
