Мукьвара Кьасумхуьрел кардик квай “Куьредин ярар” культурадин центрадин типографияда машгьур журналист ва шикилчи Райсудин Набиеван “Макъалайрин чIалалди” тIвар алай ктаб чапдай акъатна. Ам 195 чиникай ибарат я.
Ктабда Р.Набиева газетриз макъалаяр кхьиз башламишай 1952-йисалай эгечIна федеральный ва республикадин газетризни журналриз акъатай 387 ма-къала гьатнава.
Лагьана кIанда, за “Макъалайрин чIалалди” ктабдиз редакторвал авуна, зун Р.Набиеван макъалайрихъ галаз мукьувай танишни хьана. Ктабда гьатнавай макъалайрай кIелзавайдаз чи тарих, вилик йисара районда кьиле фейи вакъиаяр, тухвай мярекатар, райондин хуьруьн майишатдин кIвалахар, инсанрин кеспиярни къайгъуяр аквазва. Лугьуз жеда хьи, ктабда гьатнавай макъалайри кIелзавайдан рикIел чпин хуьруьхъ, майишатдихъ, яшайишдихъ, райондихъ галаз алакъалу гзаф крар, вакъиаяр рикIел хкида.
Мад са кар алава хъийиз кIанзава, чи къелемдин стха, кIвалахдин юлдаш, кьетIен хатI авай журналист, шикилчи, шаир Райсудин Набиева алатай йисуз вичин уьмуьрдин 80 йисан юбилейни къейд авуна. Чаз Р. Набиеваз вичин юбилей ва акъатнавай цIийи ктаб мубарак ийиз кIанзава. Адахъ мягькем сагъламвал, яратмишунрин рекьени агалкьунар хьана кIанзава.
Агъадихъ чаз газет кIелзавайбур Р. Набиеван уьмуьрдин ва яратмишунрин кIвалахдихъ галаз танишариз кIанзава.
Набиев Райсудин Жалавханович 1940-йисан 27-июндиз виликан Кьасумхуьруьн райондин Курхуьрел лежбердин хизанда дидедиз хьана. Адан аял вахтар дяведин йисарал гьалтна.
Армиядилай гуьгъуьниз, 1964-йисуз, ам СОГУ-диз гьахьна, ана филологиядин факультетда кIелна. Гьа са вахтунда Р. Набиева Даградиодинни телевиденидин, “Коммунист” (гила “Лезги газет”), “Дагъустандин муаллим”, “Колхоздин пайдах”, (гуьгъуьнлай “Халкьдин гаф”, “Коммунизмдин гатфар”, “Куьредин хабарар”), “Сельская жизнь”, “Пионерская правда” газетрихъ, “Блокнот агитатора и политинформатора”, “Дагъустандин дишегьли”, “Советское фото”, “Журналист” журналрихъ галазни, анриз материалар, шикилар ракъуриз, сих алакъа хуьз хьана, вичин журналиствилин алакьунар артухарна. Армияда авайла ада Московский округдин “На боевом посту” газетдиз макъалаяр кхьиз хьанай. Гила ам тежрибалу журналист, писатель я.
Гьа са вахтунда Р.Набиев шиирар, мезелияр, гьикаяяр кхьинални машгъул я. Адан сифте макъала 12 йиса авайла “Халийрин бегьер” кьил гана “Колхоздин пайдах” газетдиз акъатнай. Ам Сталинан тIварунихъ галай колхоздин паласада халияр битмишарзавай саларбанрин зегьметдикай тир.
2010-йисуз адан “Сифте чубарук”, кьве йисалай “Дустариз салам” шиирринни гьикаяйрин ктабар акъатна.
Хуьруьн тарихдикай материалар кIватIунални ам фадлай машгъул я. ИкI, “Зи хайи хуьр” тIвар алаз, Куьре Меликан ватан тир Курхуьруькай, 2009-йисуз куьруь тарихдин ктаб акъатна. Тарих кIватIун давамарна ва 2016-йисуз “Курхуьруькай ва адан агьалийрикай тарихдин очеркар” тIвар алаз автордин нубатдин еке ктаб чапдай акъатна. Ада гьакI виликан шаир, манидар хуьруьнви Агъамирзоев Мирзебутаян яратмишунрикай, Савзиханова Зумриятан яратмишунрикайни гъвечIи ктабар акъуднава. Мукьвара “Бахшбендер” тIвар алаз адан ирид лагьай ктабдизни экв акуна. Лагьана кIанда, “Макъалайрин чIалалди” тIвар алай и ктаб автордин муьжуьд лагьайди жезва.
Р. Набиев 2004-йисалай РФ-дин журналистрин ва лезги писателрин союзрин, райондин “Куьредин ярар” медениятдин центрадин член я. Р. Набиев алай вахтунда Курхуьруьн 2-нумрадин юкьван мектебдин муаллим я. Адахъ кIвалахдин 56 йисан тежрибани хьанва, исятда ада автомобилрикай тарсар гузва. Ам РД-дин образованидин отличник я.
Хазран Кьасумов
