Гьа ихьтин тIвар алай Вирироссиядин серенжемдин сергьятра аваз 2020-йисан 6-июлдилай 10-сентябрдалди Махачкъалада, “Журавли” комплексда, Урусатдин жуьреба-жуьре регионрай тир 650 духтурди пулсуздаказ чпин сагъламвал мягькемар хъувуна.
26-январдиз Махачкъалада, илимдинни сагъламвал мягькемардай “Журавли” комплексда, “Диндихъни медениятдихъ коронавирус акатнавайбур сагъар хъувунин карда авай менфятлувал” лишандик кваз международный дережада аваз илимдинни тежрибадин пресс-конференция кьиле фена.
Мярекат ахъайдайла “Журавли” комплексдин генеральный директор, М.В.Ломоносован тIварунихъ галай МГУ-дин профессор Мегьамед Мегьамедова къейд авурвал, конференцияди Вирироссиядин мергьяматлувилин “Баркалла духтурриз” серенжемдин кьвед лагьай пай гатIунзавайдакай хабар гузва. РикIел хкин, и гьерекатдин сад лагьай пай алатай йисан 6-июлдилай 10-сентябрдалди Дагъустанда, “Журавли” комплексда кьиле фенай. А чIавуз Дагъларин уьлкведа Урусатдин жуьреба-жуьре регионрай атанвай 650 духтурдиз сагъламвал мягькемардай шартIар арадал гъанай. Лагьана кIанда, абур вири коронавирус акатнавайбур сагъар хъувунин карда иштиракнавайбур тир.
Конференциядин кIвалахда жемиятдин, диндин, илимдин, СМИ-рин векилри, къецепатан регионрай атанвай мугьманри иштиракна. Чпин рахунра РД-дин милли сиясатдин ва динрин крарин рекьяй министрдин везифаяр вахтуналди тамамарзавай Энрик Муслимова, академик Шамил Алиева, Москвадин муфтий Альбир Крганова ва масабуру мярекатдихъ ва “Баркалла духтурриз” серенжемдихъ авай метлеб къейдна.
Гьа и юкъуз “Журавли” комплексдин мулкарал руьгьдинни марифатдин “Садвал” тIвар алай Центрани ахъайна. Ам мискIиндикай, килисадикай ва синагогадикай ибарат я. Комплексдиз чпин сагъламвал мягькемариз жуьреба-жуьре динриз икрамзавайбур къвезвайди фикирда кьуна, идарадин руководстводи ихьтин Центр арадал гъидай къарар кьабулна.
«Лезги газет»
