Абумуслим  Саидагьмедович  Гьа­жи­къу­лиев  1935-йисан 5-майдиз Кьурагь райондин КьепIиррин хуьре кесиб хизанда дидедиз хьа­на. 1942-1952-йисара хуьруьн мектеб хъсандиз кIелна куьтягьна, ам Дагъустан­дин мединститутдиз гьахьна. Институтда кIелза­вай вахтунда ада Сталинан тIвару­нихъ галай кьи­лин стипендия къачузвай. Яру дипломдалди институт куьтягьай жегьил Ростов­дин мед­институтдин ординатурадиз гьахьна.

Ру­фу­нинни ратарин Серноводск-Кавказский са­на­торийдин курортдин духтур, профессор Б.Н. ­Ми­хайлован ва Н.Б.Даниялован регьбервилик кваз «Лечение больных гастритом и язвенной болезнью на курорте Серноводск» темадай диссертация кхьена ва ам Ленинграддин кьилин физиологиядин институтда хвена.

1965-йисуз Актюбинскдин мединститутда хьайи конкурсда ам факультетдин терапиядин кафедрадин ассистентвиле хкязава ва ана адаз госпиталдин терапиядай кафедрадин доцентвилин тIвар гузва. 1970-йисуз ам Махачкъаладиз хтана.

Дерин чирвилер авай ватанэгьлиди Дагмединститутда кафедрадин доцент яз кIва­лах­ давам хъувуна. 1978-1980-йисара СССР­-дин Минздравди меслят къалурун яз А.Гьажи­къулиев Мозамбик Республикадин Мапуту ше­гьердин кьилин госпиталдин консультантвиле ва къецепатан уьлкведа авай чи Векилханадин ихтибарлу духтур яз рекье ту­на. Ана ада агьалияр сагъарунихъ галаз сад хьиз, ме­дицинадин рекьяй пешекарарни гьазурна.

Ватандиз хтайдалай инихъ А.С. Гьажи­къу­лиева мединститутда студентриз лекцияр кIел­зава, практикадин кIвалахар чирзава. Медици­надин илимрин кандидат тир адахъ илимдин 95 кIвалах ава. Ам РД-дин лайихлу духтур я.

Элла  Рагьимова,

ДГУ-дин химфакультетдин студентка