Бажарагълу Агъа СтIал макандай,

Вич гьуьрметлу гзаф хъсан хизандай,

Духтурвилин пеше кIелна лап кIандай,

Афериндив(ди) кIвалахзавай Ульзана.

 

Жегьил лезги руш я, рикIни михьид я,

Зирекди я, къилихдизни къенид я,

Сагъарзавай тIални залум “ковид” я,

Ваз Аллагьди къуват гурай, Ульзана!

 

И чкIанвай азар вири дуьньядиз

Ухшар я вич яракь гвачир дяведиз.

Ахварайни тахкурай гьич бендедиз

Гьа завалдин юкьва авай, Ульзана!

 

Са зеррени кефи хадач вичикай,

Хабар кьада тIазвай касдин рикIикай,

Шегьерар хьуй ваз ви гъвечIи хцикай —

РикIяй-рикIиз алхиш я ваз, Ульзана!

 

Жавабдарвал хиве кьуниз килигна,

Акьул, зигьин, къуватарни эцигна.

Кьиникьикай къутармишна шумуд  на,­

Ваз Аллагьди сагъ чан гурай, Ульзана!

 

Наида  Рамазанова