И йикъара Сулейман-Стальский райондин кьил Нариман Абдулмуталибов кьилин духтурханадин мулкарал компьютердин томограф кардик кутадай кьилдин объект эцигунин кIвалахрихъ галаз таниш хьана.
2020-йисан эхирра эцигиз гъиле кьур объект саки акьалтIарнава, алай вахтунда къав язава. Томограф эцигдай объект алай йисан февралдин вацран эхирра ишлемишиз вахкун пландик кутунва.
Малум хьайивал, объект эцигуниз 3 миллион манат пул акъатна. И такьатар меценатри ва райондин агьалийри гана.
Къейд ийиз кIанзава хьи, багьа къимет авай “Siemens” компьютердин томограф къачудай 3 миллион манат пул, коронавирусдин вилик пад кьунин рекьяй республикада тешкилнавай Оперативный штабдин къарардалди РД-дин Гьукуматди чара авуна.
Райондин кьил Н.Абдулмуталибов эцигунрин объектдал тухузвай кIвалахрилай рази яз амукьна.
Хазран Кьасумов
