И  мукьвара чав чIулав хабар агакьна — яргъалди чIугун та­вур залан азардикди 86 йисан яш­да авай гьуьрметлу муаллим, камаллу, ватанперес, инсанперес кас Гьажиев Гьажи Эмиргъа­евич рагьметдиз фена.

Гь.Э.Гьажиев Ахцегь райондин Къутунхъарин хуьре 1934-йи­суз дидедиз хьана. 1956-йисуз ада Дагъустандин педагогикадин С.Сулейманан тIварунихъ га­лай  институтдин физикадинни математикадин факультет акьал­тIарна. Жегьил пешекарди зегьметдин рехъ Ахцегь райондин Хуьруьгрин юкьван школада физикадин муаллим яз кIва­лахуни­лай башламишна. 1964-йи­салай 2001-йисалди Гьажи Эмиргъаевича хайи хуьруьн — Къу­­тунхъарин юкьван мектебдин директордин везифаяр тамамарна.

Гуьгъуьнин йисара кьисметди ам Дербент шегьердиз акъудна. Ина ада кьве университетдин — МСИ ва РГСУ — филиалра жуьре­ба-жуьре къуллугъар та­ма­марна. 2014-йисуз зегьмет хуьнин рекьяй­ НДОУ-дин курсар ачухна.

Дагълух хуьрерин аялриз, лезги халкьдин гележегдин несилдиз  савадлувилихъди, экуь гележегдихъди фидай рекьер ачух жедайвал къуватар эцигун, абурун къулайвал патал жезмай кьван шартIар тешкилун — муаллимди вичин кIвалахда виридалайни гзаф  фикир гузвай терефар гьа ибур тир лагьайтIа жеда. И карда ада вичин ата-бубайри кьунвай рехъ намуслудаказ давамарна.

Гь.Гьажиева тарс гайи жаванрикай еке дережайрив агакьнавай пешекарар, алимар хьанва. Пешедин рекьяй юлдашрини­ адахъ галаз мукьвал-мукьвал меслятар ийи­дай.

Гь.Гьажиеван баркаллу  зегьмет “РСФСР-дин халкьдин про­с­вещенидин отличник”, “ДА­ССР-дин лайихлу муаллим” гьуьрметдин тIвараралди,  гьакI­ни гзаф  кьадар маса шабагьралди къейднава.

Гьажи Эмиргъаевичан экуь къамат ам чидайбурун рикIе­лай садрани алатдач. Чна гьуьрметлу муаллимдин хизандиз, багърийриз ва ярар-дустариз башсагълугъвал гузва.

«Лезги газет»