Чи ватанэгьлияр — гьар сана
Чирвилерихъ, илимдихъ ялзавай, машгьур вузра агалкьунралди кIелзавай жегьилрикай чав мукьвал-мукьвал хабарар агакьзава. Ахьтинбурукай сад Россиядин Халкьарин Дуствилин университетда фармацевтикадин ва токсикологический химиядин рекьяй агалкьунралди вуз акьалтIарнавай ва илимдин шегьре рекьиз камар къачунвай Илаха Казимова я.
Ам 1996-йисан 12-августдиз Азербайжандин КцIар шегьерда юристрин хизанда дидедиз хьана.
Муракаб девирдизни килиг тавуна, юриствилин рекьяй кIелай ва Россиядин лайихлу юриствилин тIвар къачур вичин чIехи бубадал Илахади еке дамахзава. ГъвечIи чIавалай чIехи бубадилай чешне къачуз эгечIай Илаха Казимовадин бахтуни гъана. “Зи рикIел исятдани адан гафар алама, ада гьамиша кIелуни, чирвилериз майилвалуни, илимдал машгъул хьуни инсан экуь гележегдихъ тухуда лугьудай. Гьадан насигьатар, камаллу меслятар себеб яз зун хъсандиз кIелиз алахъна”, — лугьузва Илахади.
Илахадин чIехи бубадин ери-бине Мацарин хуьряй я. Дагъустандихъ галаз алакъалу вири затIар чирун ада вичиз гьамиша итижлу я лугьузва. Ам вилик эцигай макьсадрив агакьун патал датIана алахъзава, и рекье ада агалкьунарни къазанмишзава.
2001-йисуз ада КцIар шегьердин юкьван мектебдиз сифте камар къачуна. Ана кIелай вахтунда ада жемиятдин крарани активвилелди иштиракиз хьана. Гьа са вахтунда музыкадин мектебда фортепиано ягъизни чирна, инани ада вич лап хъсан ученикрикай тирди субутна, музыкадин рекьяй жуьреба-жуьре конкурсра агалкьунралди иштиракна.
Гьам юкьван мектебда, гьам музыкадин мектебдани кIелай чIавуз адан алакьунар гзаф кьадарда грамотайралди къейдна.
Музыкадихъ галаз алакъалу тиртIани, Илахади медицинадиз талукь (дарманар арадал гъунин) пеше хкягъун кьетIна.
2013-йисуз тафаватлудаказ мектеб куьтягьна, районда виридалайни гзаф баллар къазанмишна, ам Бакудин гьукуматдин университетдин химиядин факультетдик экечIна. Агалкьунралди вуз куьтягьайдалай кьулухъ са йисан муддатда КцIарин мукьув гвай дагъдин лыжайрин курортда кIвалахна. Къуллугъдин жигьетдай виликди фидай мумкинвилер авайтIани, жегьил пешекарди мадни кIелуникай, дерин чирвилер къачуникай фикирзавай. Вилик цIийи макьсад эцигай Илаха, Азербайжанда хкягъунин имтигьанрай агалкьунралди экъечIуналди, Россиядин Халкьарин Дуствилин университетдин фармацевтикадин ва токсикологический химиядин кафедрадик экечIна.
Вузда кIелдайла, ада уьлкведин ва международный хейлин конкурсра иштиракна, хъсан чкаяр кьуна. Жегьил пешекардин гзаф макъалаяр Россиядин ва къецепатан уьлквейрин жуьреба-жуьре изданийриз акъатнава. Тафаватлудаказ кIелайвиляй, викIегьвилелди ва агалкьунралди илимдал машгъул жезвайвиляй РУДН-дин кафедрадин муаллимри Илаха Казимовадиз аспирантурадик экечIун теклифна. Гьелбетда, илимдин алемдиз гьахьунин къаст авай руша теклиф еке гьевесдивди кьабулна. Къуй ам илимдин рекье вичин мурадрив агакьрай!
К.Ферзалиев
