Къенин девир муракабди я. Гьикьван инсанрин яшайиш хъсан хьанватIани, секинсузвал, къалабулух кутазвай крарни тIимил туш. Абурал коронавирусдин тIугъвални алава хъхьанва. Кефияр авачир, начагъ хьайи касдин рикIяй тефизвай хияларни авач…
Са шумуд йикъан вилик зи гьаларни пис хьана. Духтурдиз кIвализ эверуниз мажбур хьана зун.
— Ваз, хала, пис мекьи хьанва, къалабулух акатдай кар авач, — зи сагъламвал ахтармишайдалай гуьгъуьниз лагьана заз чи Чуьхверхуьруьн врачебный амбулаториядин заведующий Элина Рамазановади. — Вун кIвале къаткук, чна ви сагъламвал мягькемар хъийида.
Гьакъикъатдани, саки 10 юкъуз Элина духтур зи патав къвез, заз рапар ягъиз хьана. Ам захъ вичин багъри касдихъ хьиз гелкъвена, зи сагъламвал мягькемар хъувуна. Идай за, зи хизанди Элина Рамазановадиз сагърай лугьузва.
И келимаяр кхьидайла, зи рикIел рагьметлу шаир Рамазан Каитован шиирдин цIарарни хтана: “Гьар уьзуьрдиз вичин дарман герек я, Са вахтара ширин гафни герек я”.
Элина жегьил дишегьли, пешекар я. Гьа са вахтунда адахъ ширин мез, ачух рикI ава. Заз духтурди ягъай рапари хьиз, адан келимайри, ширин мецини куьмек гана.
Элина духтур чи эверай гьай я, гьавайда лугьузвач инсанри. Им неинки са зи, гьакIни вири хуьруьнвийрин фикир я.
Ви гъиликай вири азалуйриз чара-дава хьурай, гьуьрметлу Элина духтур!
Эрзенат Эмирбегова,
Чуьхверхуьр
