И йикъара Дагъустандиз хканвай компьютерный са шумуд томограф республикадин медицинадин идараяр патал чара авунва. Медицинадин ахтармишунар кьиле тухунал гьалтайла, къенин юкъуз чпихъ еке менфятлувал авай и тадаракар агакьдай идарайрин арада Сулейман-Стальский ва Мегьарамдхуьруьн районрин ЦРБ-ярни ава. Мадни абур Махачкъаладин аялрин ГКБ-диз, Тлярата, Табасаран, Бабаюрт, Къайтагъ районрин центральный больницайриз ва Кочубейдин медико-санитарный частуниз чара авунва.
Винидихъ тIварар кьунвай вири идарайрив диагностикадин и жуьредин тадаракар тарихда сад лагьай сефер яз агакьнава. Умудлу я, гила и районра яшамиш жезвай агьалийрихъ республикадин маса раойнриз ва шегьерриз финин, чпин сагъламвилин гьал ахтармишунин лазимвал амукьдач.
РикIел хкин: ноябрдин эхирра компьютерный томографар Избербаш шегьердин ЦГБ-див ва Левашидин ЦРБ-дивни агакьна. 11 томограф маса къачун патал такьатар республикадин бюджетдай ахъайнавай.
Дагъустандин здравоохраненидин министр Ж.Гьажиибрагьимован гафаралди, цIийи тадаракри учирар кьери хьуниз, жуьреба-жуьре четин азарар, гьа гьисабдай яз коронавирусдин азарди арадал гъанвай адетдинди тушир стIалжем фад дуьздал акъудуниз куьмекда.
«Лезги газет»
