Мукьвара газетдиз Ярагъ Мегьамедан тIварунихъ галай фондуниз регьбервал гузвай Гьажибуба Рустамован “Агъсакъалди теклифзава” тIвар алай макъала акъатнавай. Сагърай вич, макъалада кхьенвай крар чал чи яшайишдин, уьмуьрдин рекье гьар юкъуз гьалтзавайбур я. Ада лагьанвайвал, са кьадар йисарилай чи бязи хуьрера касни амукьдач. Гзаф хуьрер чи йикъара ичIи хьанва, жегьилар шегьерриз куьч жезва. И татугайвилин вилик пад кьуна кIанда эхир.
Зун чи Къуруш хуьруькай рахада. Са вад йис идалай вилик хуьре виш кIвал авай. Исятда 20-25 кIвалел тIапIарар ала. И кардин себеб вуч я? Чкадал кьил хуьдай мумкинвал тахьун. Авай кIвалахдай чкаярни гьукум гъилевайбуру чпин мукьва-кьилийрин, къавум-къардашдин арада пайзава.
Тахминан 5-10 йис идалай вилик чи хуьряй патарал кIвалахиз физвайбур авайди тушир. Гила тек са Москвада, гьеле амай чкаяр квачиз, Вини Къурушдилай къазанмишиз фенвайбурун кьадар 10-дав агакьнава.
Гьажибуба Рустамова вичин макъалада халкьдин иштираквал аваз кьиле физвай сечкияр арадал хкун теклифзава. Зани и кардин тереф хуьзва. Хуьрерин кавхаяр, районрин кьилер халкьдин иштираквал аваз хкягъун кутугнава.
Шихали Багъиров
