26-ноябрдиз Дагъустандин парламентдин депутатри “2021-йисан ва 2022-2023-йисарин пландик кутунвай вахт патал Дагъустан Республикадин бюджетдин гьакъиндай” закондин проект сад лагьай сеферда кIелайдалай кьулухъ кьабулуниз сесер гана.
Заседанида РД-дин экономикадин ва мулкар виликди тухунин министрдин везифаяр вахтуналди тамамарзавай Гьажи Султанова иштиракна.
Документдин бинедаллаз, алукьзавай йисуз региондин бюджетдин къазанжийрин кьадар 134,1 миллиард манатдин дережада аваз, харжийрин пай — 137,3 миллиард манатдин, я тахьайтIа 3,2 миллиард манатдин кьитвал аваз пландик кутунва.
Республикадин инвестицийрин программа уьмуьрдиз кечирмишун патал 2021-йисуз 12,9 миллиард манат харж авун (абурукай 3,4 миллиард манат федеральный бюджетдай я) фикирда кьунва.
Малумарайвал, алукьзавай йис, гьакIни 2022 ва 2023-йисарин пландик кутунвай вахт патал Дагъустан Республикадин бюджет, идалай вилик йисарани хьиз, яшайишдин жуьреба-жуьре терефрихъ элкъуьрнава. ИкI, “Образование”, “Здравоохранение”, “Яшайишдин политика” ва “Милли экономика” проектар алукьзавай йисузни кар алайбур яз амукьда. И хилерал умуми харжийрин 84% гьалтзава. Законопроектди республикадин бюджетдиз налогрин гьисабдай къвезвай ва налогрилай къерехдай тир къазанжийрин кьадар 4 миллиард манатдин гзафарун фикирда кьунва.
Идалайни гъейри, агъа кIанин кьадарда аваз мажибар къачузвай бюджетникрин мажибар, гьакIни яшайишдин гьалдиз талукь яз гузвай пуларин кьадар 3% хкажун патал алава харжияр фикирда кьунва.
Министрди хабар гайивал, “100 школа” проектдин сергьятра аваз ремонтрин кIвалахар тамамарунин тежриба давамарун пландик кутунва. Малум хьайивал, ихьтин кIва-лахрин нетижаяр разивал ийиз жедайбур я. И рекьиз харж авун патал бюджетда 200 миллион манат фикирда кьунва. Мад 600 миллион манат медицинадин тешкилатрин таъминвал артухаруниз ва абур алай аямди истемишзавайвал тадаракламишуниз харжда, идалайни гъейри, 382 миллион манатдихъ медицинадин идарайрин сетар ремонт авунин кIвалахар тамамардайвал я.
Алукьзавай йис патал бюджетдин виле акьадай хьтин кьетIенвал ам я хьи, Республикадин инвестицийрин программадик “Хуьрерин чкаяр вири патарихъай виликди тухун” госпрограммада фикирда кьунвай бюджетдин такьатар кутунва, гьакIни и программа республикади кутазвай паюнин гьисабдай 400 миллион манатдилай гзаф кьадарда аваз артухарнава.
«Лезги газет»
