Квез чидани?
Кеферпатан Ирландияда туристри фикир желбзавай, “Натаразрин жигъир” (Тропа гигантов) тIвар акьалтнавай ажайиб чка ава. ТIебиатдин памятникдин надирвални кьетIенвал адакай ибарат я хьи, а чкада тахминан 40 агъзур кьван базальтар (дагълух жинс, къван), устIарди чиле тунвай плитаяр хьиз, сихдаказ чилел экIя хьанва. (Шикилда).
Базальт къванерин жергедикай арадал атанвай жигъир янардагъдин (вулкан) ценерив агакьзава. Чешмейри тестикьарзавайвал, Натаразрин жигъир янардагъдин сивяй цIай кваз къванер акъатунин нетижада арадал атанва. Бязи къванер кьуд, вад, ирид, муьжуьд пипIикай ибарат ятIани, чIехи пай къванер ругуд пипIенбур я. Виридалайни кьакьан жергеда авай къванерин кьакьанвал саки 12 метрдив агакьзава.
Бязи чешмейра аниз “Натаразрин къванцин рехъ” ва я “Натаразрин рехъ” тIварар гузва. 1986-йисуз а чка ЮНЕСКО-ди виридуьньядин ирсинин объект яз, 1987-йисуз Кеферпатан Ирландиядин тIебиат хуьнин департаментди милли парк яз малумарна.
Интернетдин ачух чешмейра ихтилат физвай чкадикай бязи риваятарни, кьисаярни ава.
«Лезги газет»
