Дагъустандин гьукумдарри коронавирусдихъ галаз алакъалу гьалар себеб яз сергьятвилерин са жерге цIийи серенжемар кардик кутадайвал я. РД-дин Кьилин сайтди хабар гузвайвал, ихьтин къарар Сергей Меликова 1-декабрдиз коронавирусдихъ галаз женг чIугунин оперативный штабдихъ галаз онлайн къайдада кьиле тухвай заседанидин нетижада кьабулна.
Кьилди къачуртIа, ибадатханайриз фин вахтуналди къадагъа авун, мектебра, аялрин бахчайра, колледжра, вузра цIийи йисаз талукь мярекатар тешкил тавун теклифзава.
Заседанидин вахтунда Роспотребнадзордин Дагъустанда авай управленидин регьбер Н.Павлова малумарайвал, коронавирусдик азарлу хьайибурукай 75 процентди маскаяр алукIунин къайдадал амалнач. Азар акатунин асул себебар гзаф инсанар кIватI хьанвай чкайриз (мехъеррик, мискIинриз, алишверишдин маканриз, базарриз) финихъ галаз алакъалу яз гьисабзава.
Сергьятвилерин серенжемар мажбурибур хьун герек тирди къейд авуналди, Сергей Меликова Роспотребнадзордин регьбердин теклифрин тереф хвена.
«Лезги газет»
