И йикъара “Ахцегь район” МР-дин кьил Осман Абдулкеримов районда азархана эцигзавай чкадал фена. Адахъ райондин депутатрин собранидин председатель Абдул-Керим Палчаев ва общественный палатадин председатель Али Исмаиловни галай.

РикIел хкин: 2009-йисуз Ахцегь районда “Россиядин Кьиблепад (2008-2013-й.)” федеральный программадин сергьятра аваз ЦРБ-дин цIийи дарамат эцигунив эгечIнай.  Сифтедай объектдиз 115,8 миллион манатдин кьадарда аваз такьатар, гьа гьисабдай яз 70,4 миллион манат — федеральный бюджетдай ва 45,4 миллион манат  республикадин бюджетдай чара авунай.

2013-йисуз, программа кардик квай вахт акьалтIунихъ галаз алакъалу яз, эцигунар акъвазарнай. Райондин общественностди РФ-дин Президент Владимир Путинавай куьмек тIалабайдалай кьулухъ эцигунар давамар хъувуна.

Куьмек тIалабай “гелерихъ галаз алакъа­лу яз”, алатай йисан октябрдин эхирра Ахцегь райондиз  РФ-дин Президентдин советник Руслан Эдельгериев атана, объект ишлемишиз вахкудай вахт тайинарна. А вахтунал асаслу яз, дарамат 2021-йисан сентябрдиз ишлемишиз вахкун лазим я.

Ахцегьрин ЦРБ-дин яргъал йисара эцигна акьалтIариз тежезвай дараматдин  эцигунринни монтаждин кIвалахар кьилиз акъудун патал 180 миллион манат рекье тунва.

О.Абдулкеримов объектдиз тамашна, пудратчи организациядин векилрихъ ва рабочийрихъ галаз рахана.

Инал мадни алава хъийиз кIанзава, эцигунринни монтаждин кIвалахар кьилиз акъудун патал тендерда “Елена” ООО гъалиб хьана. Кьве сменада кIвалахун патал 70 кас желбнава.

Осман Абдулкеримов кьиле авай делегациядиз кIвалахар тамамвилелди кьилиз акъуднавай корпусар къалурна. Абурун арада садакай масадак акатдай азаррин отделение авай — анаг махсус боксрикай, азарлуяр кьабулдай ва кьилди амайбурукай чара яз къаткурдай палатайрикай ибарат я.

Санлай къачурла, дараматда пардалди чимивал гудай къурулушдиз талукь ва кьилин корпусда (ина 2-мертебада аялрин отделение ва стационар жеда) къенепата ремонтдин кIвалахар акьалтIарзава.

Администрациядин векилар операцияр кьиле тухудай залрикай садазни тамашна, абурни цIийи азарханада 3 жеда.

Муниципалитетдин регьберди эцигзавай азархана алай аямдин вири истемишунриз жаваб гудайди, чарпайрин кьадар вахтунин истемишунриз жаваб гуз жедайди тирди къейдна. Идалайни гъейри, О.Абдулкеримова эци­гунринни монтаждин кIвалахар ери аваз кьилиз акъудунихъ иллаки еке важиблувал авай­дални фикир желбна.

Алай вахтунда медицинадин идарайра авахьзавай ятар вирусрикай михьи авунихъни важиблувал ава ва вахтунини и кар ис­темишзава. Ихьтин къурулушни цIийи азарханадин мулкара кардик ква. Объектдал фейи чIавуз делегатар и ва санлай вири ­чиркин ятар михьи ийидай имаратдин кIва­лахдихъ галазни таниш хьана. ИкI, чиркин ятар михьи ийидай автономный къурулушди авахьзавай ятар вирусрикай михьи ийиз куьмекда. Идалайни гъейри, махсус тадаракри михьи авур яд мад сеферда ишлемишдай мумкинвал гузва. Имни гьа са вах­тунда инсанрин сагъламвилин, гьакIни тIебиатдин ва адан ре­сурсрин гьакъиндайни къайгъударвал чIугун я.

ЦIийи азарханада экуь ва къулай палатаяр, гегьенш столовой, тIуьнар недай чка, гьар са мертебада гьамамар, михьивилердай­ чкаяр жеда. Объектдихъ хсуси подстанция, чимивал гудай къурулуш ава. Адан патарив гвай чкайра къир цанва. Са гафуналди, азарханади алай аямдин вири истемишунриз жа­ваб гузва. 2009-йисав гекъигайла, къенин юкъуз чавай инанмишвилелди лугьуз жеда: райондин чкIидай гьалда авай азархана цIийи, алай аямдин вири истемишунриз жаваб гудай, лазим вири тадаракралди таъмин тир дараматдиз экъечIдай югъ яргъал алач.

Чи мухбир