Мегьарамдхуьруьн райондин майишатра емишрин, кьилди къачуртIа, хурмайрин бегьер кIватI хъувунин кIвалахар кьиле физва. И кIвалахда кар алайди назик емишар тарарилай вахтунда ва зарар тагана кIватIун я. Базаррин ва туьквенрин дезгейрал ерилу суьрсет агакьарун патал са жерге себебар, кьилди къачуртIа, емишрин сорт, ам битмишарунин технология ва тIебиатдин шартIар кваз кьуна кIанзава, хабар гузва чаз Мегьарамдхуьруьн райондин администрациядин пресс-къуллугъди.
Хуьруьн майишат, кьилди къачуртIа, багъманчивал Мегьарамдхуьруьн райондин экономикадин кар алай хилерикай сад я. “КьетIенди тир кьиблепатан гьавади ва районда хуьруьн майишат виликди тухун патал арадал гъанвай къулай шартIари гьасилзавай хуьруьн майишатдин суьрсетдин кьадар йисалай-суз артухардай мумкинвал гузва”, — къейдзава муниципалитетдин кьил Фарид Агьмедова.
ИкI, райондин мулкунал алай хуьруьн майишатдин “Гранит” кооперативда хурмайрин бегьер 13 гектар чилелай кIватIзава.
Аламатдинди тир и емишдин ери-бине Китайдай я. Грек чIалай адан тIвар “гъуцарин ем” ва я “гъуцарин цIай” яз таржума ийизва. Хурмадин тар 50-60 йисуз экъечIзава. ТIямлу дад себеб яз, емиш Европадани, Азиядани, Америкадани, Австралиядани машгьур я.
“Гранит” СПК-да хурмадин “шиш бурун” сорт битмишарзава. Ам яргъал рекьиз тухуз жедай, вижевай акунар ва дад авай, гьакIни гзаф кьадар хийирлу шейэр квай емиш я.
КIватIнавай бегьер ина муьштерийри кьабулиз жедай къиметдай — са кг 35 манатдай маса къачузва.
Майишатдин бригадир Мирзе Балабегова къейдзавайвал, “шиш бурун” маса гун патал гьасилунин жигьетдай гележег авай сорт я.
Къейд ийин, СПК-дин чилерал алай вахтунда 125 гектарда шуьмягърин, 13 гектарда хурмадин, 17 гектарда хъархъун, 12 гектарда ципицIрин багьа сортарин багълар кутунва. ГьакIни ина, Ленинграддин областдин Тосненский райондихъ галаз стхавилин алакъайрин икьрардин сергьятра аваз, вижевай сортарин картуфар цаз им пуд йис я.
Мегьарамдхуьруьн районда багъларин санлай къачур кьадар 6253 гектардиз барабар я. Абурукай 4857 гектарда цанвай тарар бегьердал атанва. Хурмайрин къелемар цун патал 147 гектар чил чара авунва. Лежберрин гафаралди, са гектардай ина 18-20 тонн бегьер вахчузва.
«Лезги газет»
