И йикъара Дагъустандин медицинадин идарайриз азарлуйриз тади гьалда куьмек гунин мураддалди 48 машин (Lada Largus) рекье тунва. Абур республикадин бюджетдин такьатрин гьисабдай маса къачунва. Дагъустандин здравоохраненидин министр Ж.Гьажиибрагьимова машинра кардик квай тадаракар ахтармишна, тIугъвалдин четин шартIара зегьмет чIугвазвай духтурриз сагърай лагьана.
РикIел хкин: алай йисуз дагъустанвийриз тади гьалда куьмек гунин мураддалди 73 (республикадив икьванбур санал мад садрани агакьайди туш) машин маса къачунва. Вири санлай, реамобиларни кваз, чи республикадиз 130 машин агакьна.
Министрди къейд авурвал, цIийи машинар маса къачуни амбулаторийра медицинадин куьмек гунин кар хъсанарда. Абурухъ азарлудаз тади гьалда куьмек гун патал вири къулайвилер (тележка-каталка, носилкаяр…) ава. Коронавирусдин тIугъвалдин шартIар фикирда кьуналди, абур яргъал тевгьена кIвалахдай чкайриз: республикадин, гьакIни са жерге районрин ва шегьеррин медицинадин идарайриз рекье твадайвал я.
«Лезги газет»
