Гьар йисуз чи уьлкведа, гьа гьисабдай яз Дагъустандани, агьалийриз гриппдиз акси рапар ягъунин кампания кьиле физва. Пешекарри вахтунда рапар ягъун гриппдин вилик пад кьунал гьалтайла виридалайни нетижалу серенжем яз гьисабзава. ИкI, гриппдиз акси раб янавайбур адак азарлу хьунин дережа кьве сеферда агъузарзава. Эгер грипп акатайтIа, ам кьезилдиз, яни бедендиз зарар тахьана алатзава. 6-ноябрдиз Дагъустандин здравоохраненидин министерстводин сайтда хабар ганвайвал, республикада 733 785 касдиз гриппдиз акси рапар янава, абурукай 400 агъзурдалай виниз аялар я.
И чешмеди мадни хабар гузвайвал, алай вахтунда гриппдиз талукь гьалар писзавач. ИкI, эхиримжи гьафтеда Дагъустанда сезондин гриппдикди начагъ хьунин 2240 дуьшуьш къейднава, алатай йисарив гекъигайла, им хейлин тIимил я.
Дагъустандин здравоохраненидин министр Жамалудин Гьажиибрагьимова гриппдиз акси раб сифтегьанбурун жергедик кваз янава. Вичелай чешне къачуналди, ада республикадин амай агьалийризни и кар кьилиз акъудуниз эвер гузва.
— Азар сагъардалди адан вилик пад кьун регьят я. Къенин юкъуз республикадин медицинадин вири идараяр гриппдиз акси вакцинадалди таъмин я. Коронавирусдин тIугъвалдин вахтунда гриппдикай иммунитет хьуни, садакай масадак акатдай кьве азар саналди акатуникай хуьда. Идахъ галаз сад хьиз, кфетлу тIуьни, физический жигьетдай активнивилини азардин вилик пад кьаз куьмекда, — алава хъувуна министрди.
РикIел хкин: цIи гриппдиз акси рапар ядай кампания виликан йисарилай са тIимил фад башламишнава. Алай йисуз региондин 60 процент (саки 1,5 миллиондилай виниз тешкилзава) агьалийриз рапар ягъун пландик кутунва.
«Лезги газет»
