И мукьвара Ахцегьрин хуьруьн агьалийрин спортдин уьмуьрда лишанлу вакъиа хьана. Ина 1-нумрадин мектебдин патав яргъал йисарин эцигунриз элкъвенвай спортдин майдан эхирни туькIуьрна куьтягьна ва ам ишлемишиз вахкуниз талукьарнавай шад мярекат кьиле фена. Ана райондин кьиле авай ксари, активди, мугьманри ва хуьруьнвийри иштиракна. Идакай райондин сайтда хабар ганва.
Спорт — им сифте нубатда сагълам уьмуьр кечирмишун лагьай чIал я. Идахъ галаз сад хьиз, спортди уьмуьрда дуьз рехъ хкягъизни, вилик макьсад эцигиз ва ам кьилиз акъудиз чалишмиш жезни, хъсан къилих, къайда-низам авай ксар жезни, са гафуналди, виликди финиз куьмекзава, хъсан патахъай таъсирзава. Дагъустандин спортсменрин агалкьунри жегьилрик мадни еке гьевес кутазва. Идани, вичин нубатдай яз, спортдин инфраструктурадиз талукь месэладин важиблувал къалурзава. И жигьетдай яз Ахцегь районда эхиримжи 7 йисуз кардик квай вири спортшколаяр цIийи къайдада туьхкIуьрнава. Спортдин са шумуд объект ишлемишиз вахканва.
Шад мярекатдал Ахцегь райондин кьилин заместитель Вадим Агъасиева къейд авурвал, цIийи объект ишлемишиз вахкун — им цIийи мумкинвилер ачухун лагьай чIал я.
— Спортдин ихьтин объектар ишлемишиз вахкуни — жаванриз ва жегьилриз спортдал машгъул жедай хъсан мумкинвилер яратмишуни — чаз Россиядин спортда чпин тIварар таз алакьдай жегьилар майдандиз акъудиз куьмекда.
Ахцегьа ишлемишиз вахканвай майдан кьве зонадиз пайнава: футболдин чIур (искусственный жуьредин чIур экIянавай ада 800 квадратный метр кьазва) ва михьи гьавадал баскетбол, волейбол ва гимнастика патал майдан.
Мярекатдал “Ахцах” тIвар алай футболдин чIехибурун командадин варар хуьдайди тир Тимур Агьмадовни рахана. Ада районда футбол вилик тухун патал тешкилнавай шартIарал ва къенин юкъуз жегьилриз яратмишнавай мумкинвилерал фикир желбна. Гуьгъуьнлай рахай ксарини: — “Спортдин академия” ООО пудратчидин векил К.Мегьамедова, Ахцегь райондин депутатрин собранидин председатель А.-К. Палчаева, Ахцегьрин 1-нумрадин СОШ-дин директор С.Мамаевади ва масабуруни жегьилрихъ спортдин рекье еке агалкьунар хьун алхишна.
Мярекат муниципалитетдин культурадин управленидин артистри, А.Жалиловадин тIварунихъ галай искусствойрин школада устадвал хкажзавай ва “Жаван космонавт” аялрин бахчада тербия къачузвай аялри мадни гурлу авуна.
«Лезги газет»
