Образованидин ва илимдин хиле гуьзчивалдай федеральный къуллугъ 2021-йисуз Государстводин сад тир имтигьан (ЕГЭ), коронавирус себеб яз, арада мензил аваз вахкудай къайда ишлемишунин мумкинвилиз килигзавач. Идакай Вирироссиядин аялрин диде-бубайрихъ галаз хьайи онлайн-гуьруьшдал идарадин кьил Анзор Музаева суьгьбетна.
“Алай вахтунда чахъ авай технологийри къе чаз ихьтин кам къачудай мумкинвал гуда лагьана фикирзавач”, — лагьана ада, суалдиз жаваб гудайла. Музаеван гафаралди, къенин юкъуз имтигьан вахкузвайбурал яргъал мензилда аваз гуьзчивал авун таъминардай мумкинвал гьелелиг авач.
Рособрнадзордин кьили умуд кутурвал, ЕГЭ кьиле тухудай вахт алукьдайла, адан форматдиз талукь месэла, къенин юкъуз хьиз, хциз акъвазна амукьдач.
Анзор Музаева къейд авурвал, 2020-йисуз ЕГЭ “лазим кьадар вини дережада аваз” кьиле фена. Имтигьан вахкузвай вахтунда азар гегьеншдаказ чкIай дуьшуьшар хьаначир.
Мукьвара РФ-дин просвещенидин министр Сергей Кравцова малумарайвал, гьелелиг властри 2021-йисуз ЕГЭ ва ОГЭ тухудай вахтар дегишарун пландик кутунвач.Адан гафаралди, и месэла веревирд авунин лазимвални авач.
Кравцова гьакIни хабар гайивал, Россиядин мектебар аялриз яргъал мензилда аваз (дистанционный) чирвилер гудай къайдадал элячIунихъ галаз алакъалу планарни авач. Россиядин властри са шумуд сеферда къейд авурвал, адетдин жуьредин образование са куьнивайни эвез ийиз жедач.
Къейд ийин, Анзор Музаева 2021-йисан ЕГЭ-диз талукь дегишвилерикайни лагьана.
Алай 2020-йисан ЕГЭ вахкудайла, уьлкведа тIугъвалдихъ галаз алакъалу муракаб гьалар арадал атун себеб яз, 9-классар куьтягьай вири аялриз, гьакIни 11-класс акьалтIарнавай, амма Россиядин вузрик экечIдай фикир авачирбуруз имтигьанар вахкун тийидай ихтияр ганай. И мумкинвиликай менфят къачуна, аялри чирвилер гунин талукь тир пай акьалтIарнавайдан гьакъиндай документар къачуна.
Тежрибади субутайвал, ихьтин къайдадихъ бине ава ва ам гьамиша, гьатта уьлкведа тIугъвалдихъ галаз алакъалу гьалар тамамдаказ гуьнгуьна гьат хъувурдалай кьулухъни туртIа, хъсан я. ИкI, 2021-йисуз агъадихъ галай дегишвилер жеда:
11-класс куьтягьнавай, амма вузрик экечIун фикирда авачир аялриз чирвилер гун ЕГЭ вахкун тавуналди акьалтIардай мумкинвал гуда;
9 ва 11-классар куьтягьнавай, амма ГИА вахкун тавунвай аялривай чирвилер къачун колледжра давамариз жеда (экечIдайла аттестатдин юкьван балл гьисаба кьада);
10-классда кIелун давамарун патал 9-классдин аялри ОГЭ вахкун лазим жеда; РФ-дин университетрик экечIун патал, виликдай хьиз, ЕГЭ-дин нетижаяр къалурун чарасуз шартI яз амукьда.
«Лезги газет»
