“Чкадин кьил кутунар” проектдин сергьятра аваз республикадин меркездин Ленинский комсомолдин паркуна, 6,4 миллион манат харжна, аялар къугъвадай майдан туькIуьрда. Идан гьакъиндай “Лезги газетдиз” РД-дин экономикадин ва мулкар вилик тухунин министерстводин пресс-къуллугъди хабар гана.
“Дагъустандин экономика вилик тухунин министерстводи конкурсдин бинедаллаз хкягъун кьиле тухвана. Адан нетижайрал асаслу яз “кьил кутунар” уьмуьрдиз кечирмишун патал субсидия гунин гьакъиндай къарар кьабулна”, — хабар гузва малуматда.
Аялар къугъвадай майдандал хейлин кIвалахар кьиле тухун планламишнава: пару эцигда, чил асфальтдалдини бетондалди ва резиндалди кIевирда, къецел пад ишигъламишда, гьакIни ана аялар авахьдай гъвечIи кIунтIар, перпилагар ва маса шейэр эцигда. Идалайни гъейри, тадаракар хуьн ва яшайишдин игьтияжар патал администрациядин дараматни капитальнидаказ ремонтда.
Санлай къачурла, и кIвалахар кьиле тухун патал 6,4 миллион манат чара ийида: и кьадардикай 4,7 миллион — республикадин бюджетдин такьатрай, 800 агъзур манат — Махачкъала шегьердин муниципальный бюджетдай, 970 манатни — меценатрин такьатрай.
«Лезги газет»
