Дагъустандиз азаддаказ кьуршахар кьунай пагьливанар гьазурдай чад лугьун дуьшуьшдин кар туширди и мукьвара мад субут хъхьана. Виридаз малум тирвал, 16-далай 18-октябрдалди Московский областдин Наро-Фоминск шегьерда азаддаказ кьуршахар кьунай Россиядин чемпионат кьиле фена. Уьлкведин машгьур спортсменри гьасиррал чпин устадвал къалурна.
Дагъустандин хкянавай команда чемпионатда жуьреба-жуьре — 21, кьилиндини, заланвилин 10 категориядикай 8-дай, къизилдин медалар къазанмишуналди, 1-чкадиз лайихлу хьана. Мадни шадвилелди а кардикай хабар гуз кIанзава хьи, и зурба агалкьуник чи ватандашар тир пагьливанрини лайихлу пай кутуна. ИкI, Даурен Куругълиева 86 кг-дал къведалди заланвал авайбурун арада, вич виридалайни викIегьди тирди субут авуналди, къизилдин ва Рамазан Ферзалиева 61 кг-дал къведалди заланвал авайбурун арада гимишдин медалар къазанмишна. Къуй чи кьегьал пагьливанрикай дуьньядин, Олимпиададин чемпионарни хьурай! Дагъустандин хкянавай командадин зурба агалкьун республикадин Кьилин везифаяр вахтуналди тамамарзавай Сергей Меликовани тебрикна…
Къейд авун лазим я хьи, Россиядин чемпионат алай йисан декабрдиз Сербиядин меркез Белград шегьерда кьиле фидай дуьньядин чемпионатдин вилик кар алай акъажунар тир. ГьикI хьи, адан нетижайриз килигна, Россиядин хкянавай команда тешкилдайвал я. Идахъ галаз сад хьиз, къведай йисуз (малум тирвал, цIи кьиле тухвана кIанзавай и къугъунар коронавирусдихъ галаз алакъалу яз 2021-йисал хканва) Токиода кьиле фидай Олимпиададин къугъунра иштиракун патал путёвка къазанмишунал гьалтайлани, и чемпионатдихъ еке важиблувал ава.
Россиядин чемпионатдин вири пуд юкъузни акъажунар кьиле физвай зал тамашачийрив ацIанвай. Эхиримжи юкъуз сад лагьайди яз гьасиррал Даурен Куругълиев экъечIун лазим тир. Ада финалдин къизгъин бягьсина Кеферпатан Осетия-Алания республикадай тир Артур Найфоновахъ галаз вичин къуватар ахтармишна, 2:1 гьисабдалди гъалибвал къазанмишна. Заз са кардал фикир мадни желб ийиз кIанзава: А.Найфоновахъ галаз Д.Куругълиев жуьреба-жуьре акъажунра икьван чIавалдини са шумудра “гуьруьшмиш хьайиди” тир (гьатта алай йисан сифте кьиляй хьайи Ярыгинан турнирдани). Ам себеб яз чи ватандаш къизилдин медалрикай хкатай дуьшуьшарни хьанай. Гила лагьайтIа, Даурена адаз гъалибвал къазанмишдай са зеррени мумкинвал тунач. Эхь, и бягьсина гъалиб хьунихъ — Артур Найфоновалай кьисас вахчунихъ чи спортсмен патал еке важиблувал авай. Гъалибвал Даурена вичин кIеви дуст, алай йисан февралдиз Таиландда авариядик акатай спортсмен Арсен Гусбановаз бахшнава.
«Лезги газет»
