Алатай гьафтеда Дагъустандиз Россиядин Гьукуматдин Председателдин заместитель — Дальний Востокдин Федеральный округда РФ-дин Президентдин тамам ихтиярар ганвай векил Юрий Трутнев атана.
Республикадихъ галаз таниш жедай вахтунда вице-премьерди Дагъустандин руководстводал федеральный органрихъ галаз вилик финин дибдин хилер кьве вацран къене тайинарун тапшурмишна. Идан гьакъиндай ада региондин журналистрихъ галаз гуьруьшмиш хьайила лагьана.
“Чна вилик финин дибдин хилер веревирдна, коммунальный инфраструктурадин, хуьруьн майишатдин, гьуьлуьн портунин, балугърин хилен, туризм вилик тухунин, инвестицияр желб авунин гьакъиндай ихтилатар авуна. Кьве вацран вахтунда чун мад сеферда Москвада гуьруьшмиш хьун лазим я ва гьана чна саналди кьилиз акъуддай программайрин гьакъиндай месэла гьялда. ГьикI авуртIани, региондин Кьилин къуллугъ вахтуналди тамамарзавай касди и месэла гъиле кьун лазим я. Эгер чна санал кIвалахайтIа, идакай хийир хкатда”, — лагьана Ю.Трутнева.
Вице-премьерди, региондиз инвестицияр желб авунал гьалтайла, Дагъустан 80 лагьай чкадал алайди къейдна. “Гьелбетда, ихьтин карди вилик фидай мумкинвилер арадал гъидач. ГьакI хьайила, чна вири месэлайрин гьакъиндай фагьум — фикир авун герек я”, — лагьана Россиядин Гьукуматдин Председателдин заместителди.
Вичин нубатда Дагъустан Республикадин Кьилин къуллугъ вахтуналди тамамарзавай Сергей Меликова малумарна хьи, совещанидин вахтунда вице-премьерди, муракаб месэлайриз хьиз, гьакI гележегдин гьаларизни фикир гана. “Къе чна республика экономикадин жигьетдай вилик тухуниз талукь яз ва чи виликан планра дегишвилер хтунин гьакъиндай устадвилин хъсан тарс къачуна. Чун алатай планрикай къерех жезвач. Чна республикадин промышленностдин, хуьруьн майишатдин месэлайриз талукь крарни давамарда”, — лагьана С.Меликова.
«Лезги газет»
