Алатай гьафтедин ял ядай йикъара Сулейман-Стальский райондин КIварчагърин хуьре, Гь.Аллагьвердиеван тIварунихъ галай бокс вилик тухудай центрада, асул гьисабдай 2006 ва 2007-йисара дидедиз хьанвай жаванрин арада боксдай райондин ачух турнир кьиле фена. Ам КIварчагърин боксдин школада вердишвилер къачузвай викIегь боксёррикай сад тир, вахтсуздаказ кечмиш хьайи Мирзамегьамед Абдулвагьабован экуь къаматдиз бахшнавай.
Турнирда Сулейман-Стальский, Мегьарамдхуьруьн, Къайтагъ, Дахадаев районрай, Махачкъала, Каспийск, Дербент, Избербаш, Дагогни шегьеррай, Белиж, Первомайск, Геджух, Уркарах,Кубачи, Чинар хуьрерай атанвай командайрик (гьакIни кьилди кIварчагъвийрикай ибарат тир командадик) кваз 84 боксёрди чпин устадвал къалурна. Турнир международный Олимпийский комитетдин къайдайрал амална кьиле тухвана. Адан тешкилатчияр РД-дин боксдин федерация, райондин администрациядин физический культурадин, спортдин, туризмдин ва жегьилрин крарин рекьяй комитет тир. Спортдин мярекат хъсан тешкиллувал аваз кьиле фин патал боксдай РД-дин Кьиблепатан зонадин старший тренер Альберт Межидова еке зегьметар чIугуна. Адаз, райондин руководстводиз, турнирдин кьилин спонсор тир меценат Мамед Абасоваз, пулдин такьатар чара авур амай ксаризни — “Карчагский сельсовет” АСП-дин кьил Завидин Загьирбеговаз, Къурбанмегьамед Къурбанмегьамедоваз, Абдулвагьабоврин хизандиз, тешкиллувилин крара алакьдай куьмекар гунай Белиждин спортшколадин директор Тамерлан Зейналоваз ва масабурузни рикIин сидкьидай сагърай лугьуз кIанзава.
Къизгъин бягьсерин нетижада заланвилин жуьреба-жуьре категорийрай финалдиз 29 боксёр акъатна. Абуруз виридаз кубокар, грамотаяр ва къиметлу пишкешар гана. Спонсоррин патай кьилдин пишкешар — боксдин статуэткаяр гуналди виридалайни хъсан боксёрарни къейдна. Финалдин бягьсерилай гъейри, мадни са бягьс тамашачийрин рикIел яргъалди аламукьдайди хьана. Амни Мирзамегьамед Абдулвагьабова вичин къуватар ахтармишай заланвилин категориядиз талукьди тир. ИкI, турнирдин тешкилатчи, тренер Альберт Межидован гафаралди, и бягьсина кIварчагъви Надирбег Жабраилова ва Геджухдай атанвай Рагьимхан Къаибханова чпин гъутарин къуватар алцумна. Нетижада тренер Альберт Межидован гъилик вердишвилер къачузвай Н.Жабраилов гъалиб хьана. Адаз — 5 агъзур, Р.Къаибхановазни 3 агъзур манатдин кьадарда аваз кьилдин пишкешар гана. Гаф кватай чкадал мадни са кар къейд ийиз кIанзава: финалдиз акъатай спортсменрикай 7 кас тренер А.Межидован гъилик тербия къачузвай жаванар я.
Турнирдин гъалибчийрив ва призёррив шабагьар вахкуниз талукьарнавай мярекатда райондин кьил Нариман Абдулмуталибова, райондин физический культурадин, спортдин, туризмдин ва жегьилрин крарин рекьяй комитетдин председателдин заместитель Муслим Селимова, винидихъ тIварар кьунвай спонсорри ва масабуруни иштиракна.
— Играми спортсменар, гьуьрметлу тамашачияр, боксдал рикI алай ксар! Ихьтин турниррин нетижа яз, жаванриз пешекарвилин спортдин “дад” чир жезва. Ихьтин къайгъударвал, чпиз дикъет гун акурла, аялриз хъсан нетижаяр къазанмишиз ва спортда кьакьан кукIушриз хкаж жез кIан жеда. Гзафбуруз къенин акъажунар чпин къуватар къалурдай, устадвал ва тежриба хкаждай, викIегь ва зайиф терефар ахтармишдай майдан я. Бязибуру чпин уьмуьрда сад лагьай бягьсер кьиле тухвана. Тежрибалу спортсменри боксдал рикI алай ксариз къизгъин ва гуьрчег бягьсер багъишна. Шаксуз, и турнир райондин спортдин уьмуьрда лишанлу вакъиа я. Чна ам мадни вилик тухуз куьмекда, — къейдна Нариман Шамсудиновича.
И мярекатдал Нариман Абдулмуталибовав районда бокс вилик тухуник лайихлу пай кутунай РД-дин боксдин федерациядин тIварунихъай Гьуьрметдин грамотани вахкана.
Къейд авун лазим я хьи, турнирдин макьсад районда бокс вилик тухун, бажарагълу боксёрар майдандиз акъудун, гьакIни республикадин жуьреба-жуьре пипIерай атанвай спортсменрин арада дуствилин алакъаяр мягькемарун тир. Спортдин серенжем хъсан тешкиллувал аваз кьиле фин патал адан тешкилатчийри рикIивай зегьмет чIугунвай. ИкI, турнирдин вири иштиракчийриз — аялриз, тренерриз ва судьяйриз кьве юкъуз пулсуздаказ тIуьнар гана. Яргъай атанвай 30 спортсмен патал ксудай чкаяр чара авуна. Турнирдин иштиракчийри ва иниз мугьман хьанвай вири ксарини КIварчагъа спортдин вири къулайвилер авай имарат эцигунай меценат Имам Яралиеван тIварунихъни алхишдин келимаяр лагьана.
Рагнеда Рамалданова
