27-сентябрдиз Мегьарамдхуьруьн районда тамунни вацIун патав гвай Ламан кIам лугьудай чкада, Советрин Союздин Игит Абас Исрафилован экуь къаматдиз бахшна, тарелкаяр цIалцIам луьледин тфенграй ягъунай (стендовая стрельба) районда сад лагьай сефер яз турнир кьиле тухвана.
Райондин кьил Ф.Агьмедова спортдин мярекатдин иштиракчийрин тIварцIихъ хуш келимаяр лагьана. А.Исрафилован экуь къамат эбеди яз рикIера хуьн патал районда гьар йисуз спортдин хейлин серенжемар кьиле тухузвайди, абур тухун давамардайди, гьа жигьетдай яз и турнирни гележегда гьар йисуз кьиле тухун пландик квайди къейдна.
Турнирда иштиракайбурун чIехи пай райондин гъуьрчехъанвилин тешкилатдин векилар, гьакIни Россиядин ВДВ-дин ветеранрин Союздин Кьиблепатан Дагъустанда авай ветеранар-десантникар ва сергьят хуьдайбур тир. ИкI, “Виридалайни хъсан лишанар кьадайди” тIвар къазанмишун патал 55 касди чпин алакьунар къалурна. Абурухъ лишанар кьунай виниз тир устадвал авайди ханвай кьадар къапари субутзавай.
Турнир хъсан тешкиллувал аваз кьиле фена. КIватI хьанвайбуруз чуьлдал гьазурнавай хуьрекар дадмишдай мумкинвални хьана. Эхирдай турнирдин гъалибчийрив ва призёррив Ф.Агьмедова дипломар ва пулдин пишкешар вахкана.
«Лезги газет»
