Эхиримжи йисара Дагъустанда багъманчивилин хел йигин камаралди вилик физва. И кардиз таъсирзавай къуватрикай сад инвесторар я. Лагьана кIанда, асул фикир суперинтенсивный жуьредин (яни са гектардин майдандал 2500-лай виниз тарар цун) багълар кутуниз гузва. Мегьарамдхуьруьн райондин “Сад” КФХ-дани гьа ихьтин къайдадал амалзава.
Майишатда инвестицийрин чIехи проект кьилиз акъудунин сергьятра аваз алатай йисуз 140 гектардин майданра ичерин суперинтенсивный жуьредин багъ кутуна. Къелемар цун патал ина 300 гектар чара авун къарардиз къачунва. Дагъустандин хуьруьн майишатдин ва недай-хъвадай суьрсетдин министерстводин пресс-къуллугъди хабар гузвайвал, республикадин вири АПК (агропромышленный комплекс) патал еке метлеб авай проектдик кьил кутурди хейлин йисара региондин районрикай садаз регьбервал гайи, гуьгъуьнлай РД-дин хуьруьн майишатдин ва недай-хъвадай суьрсетдин министр яз кIвалахай Керимхан Абасов я.
Мукьвара багъдиз РД-дин хуьруьн майишатдин ва недай-хъвадай суьрсетдин министрдин сад лагьай заместитель Шарип Шарипов ва республикадин Халкьдин Собранидин аграрийрин сиясатдин рекьяй кардик квай комитетдин член Рамазан Мирзаев мугьман хьана. Абуру майишатда кIвалах тешкилнавай гьалдиз еке къимет гана. Къейд ийин хьи, КФХ-да са йис идалай вилик цайи къелемри сад лагьай бегьерни ганва. ЦIи ина 250 тонндив агакьна емишар кIватI хъийидайвал я.
Проектдин сергьятра аваз ина емишар хуьдай ва алай аямдин технологийралди таъминарнавай махсус комплекс эцигун пландик кутунва. Санлай къачурла, комплексда 10 агъзур тонндив агакьна емишар хуьз жеда. Алай вахтунда проектдинни сметадин документация гьазурунин кIвалахар акьалтIарзава. Мукьвал тир девирда эцигунрин кIвалахривни эгечIдайвал я.
Къейд ийин хьи, багъ Мегьарамдхуьруьн райондин Чепелрин хуьруьн сергьятра авай мулкарал кутунва. Ина цанвай жуьреба-жуьре жинсерин ичерин къелемар Сербиядай гъанвайбур я. КФХ-дин регьбер Заур Аразован гафаралди, кIватIзавай бегьер асул гьисабдай республикадилай къецепата маса гузва. Багъда патарив гвай хуьрерай къвезвай 30-дав агакьна рабочийри кIвалахзава ва йикъан къене юкьван гьисабдалди гьар сада 800-1000 манат пул къазанмишзава.
Шарип Шарипова вичин рахунра къейд авурвал, хуьруьн чкада ихьтин проектар кьилиз акъудунихъ еке метлеб ава. Абуру Дагъустандин экономикадин гележег патал кIвалахзава, гьавиляй республикадин хуьруьн майишатдин ва недай-хъвадай суьрсетдин министерстводи ихьтин проектар кьилиз акъудунин карда куьмекарни гуда.
«Лезги газет»
