Онкологиядин азаррикди начагъ инсанар сагъарунин карда хъсан терефдихъ дегишвилер хьун гуьзлемишзава. ИкI, Дагъустандин здравоохраненидин министерстводи нурарин куьмекдалди сагъардай тадаракар — линейные ускорители — маса къачун патал контракт кутIуннава. Гьа са вахтунда нубатдин сеферда министерстводи такьатар кьенятуналди, онкоцентр патал лазим тадаракар мадни маса къачудай мумкинвал хьанва. Идакай “Лезги газетдиз” РД-дин здравоохраненидин министерстводи хабар гана.
Къейд авун лазим я хьи, нурарин куьмекдалди сагъардай, чеб лап багьабур тир тадаракар маса къачун патал 653 миллион манат регионда уьмуьрдиз кечирмишзавай “Онкологиядин азаррихъ галаз женг чIугун” проектдин сергьятра аваз чара авуна. Гьа са вахтунда здравоохраненидин министерстводилай лазим тадаракар маса къачудай алишверишдин крар кьиле тухудай чIавуз са кьадар такьатар кьенят ийиз алакьна. Гила а такьатрихъ онкологиядин азаррикди начагъбур сагъарун патал лазим маса тадаракар маса къучудайвал я. Вири санлай медицинадин 54 тадарак. Винидихъ тIвар кьунвайбурни кваз абурун кьадар 62-дав агакьда.
РД-дин здравоохраненидин министр Жамалудин Гьажиибрагьимован гафаралди, алай аямдин тадаракри Дагъустандин духтурриз чIуру дакIунрикди азарлу ксар агалкьунралди сагъариз ва вишералди инсанрин уьмуьр къутармишиз куьмекда.
— Лугьуз жеда хьи, ракдин азарар сагъарун патал дуьньяда авай алай аямдинбурукай виридалайни хъсанбурукай сад тир аппарат мукьвара онкоцентрадин духтуррин ихтиярда гьатда. Чавай, чIехибуруз хьиз, аялризни куьмек гуз жеда. Чи агьалийриз федеральный клиникайриз фин мад лазим къведач. Абурувай алай аямдин медицинадин куьмек жуван республикада къачуз жеда, — къейдна министрди.
Накь ада цIийи тадаракар эцигун лазим тир чка гьазурунин кIвалахар кьиле физвай гьал ахтармишна. Алай вахтунда онкоцентрада винидихъ тIвар кьунвай багьа тадаракар эцигдай цIийи корпус хкажзава. Эцигунрин кIвалахар йисан эхирдалди акьалтIарун лазим я.
«Лезги газет»
