Зул — 2020

И йикъара чун Сулейман-Стальский райондин хуьруьн майишатдин ва суьрсетдин управленидин начальникдин заместителар тир Гьамидин Абдулкъафаров ва Къазиагьмед Абумислимовни галаз ципицIар кIватI хъийизвай карханайриз, лежбервилинни фермервилин майишатриз фена, анра бегьер кIватI хъувунин кIвалахар тешкилнавай гьаларихъ галаз таниш хьана.

Эминхуьре кардик квай “Аллахвердиев” КФХ. И ма­йи­­шатдиз вичи виликдай саки 30 йисуз “Аламишинский” совхозда уьзуьмчивилин бригададин бригадирвиле ва кьилин агрономвиле кIвалахай Алимет Алагьвердиева регьбервал гузва.

— Чи хизанди тешкилай лежбервилинни фермервилин майишатдихъ 2008-йисуз кутунвай 8 гектар уьзуьмлухар ава, — лугьузва А.Алагьвердиева. — Анрин гьар са гектардай чна гьар йисуз 100 центнердилай виниз ципицIар кIватI хъийизва.

КФХ-да ципицIар атIунал 20 рабочий, абур Дербент­диз­ дашмишунал “ГАЗ-53” маркадин кьве машин машгъул­ тир. КIвалахда тафаватлу жезвай рабочийрикай Ж.Женетован, А.Мегьамедовадин, А.Абдулаеван, С.Алагь­вер­диевадин, И.Селимовадин, шоферар тир А.Абдукеримован, Х.Сейфудинован ва масабурун тIва­рар кьаз жеда.

Тежрибалу уьзуьмчи Алимет Алагьвердиева чаз лагьайвал, алай йисуз уьзуьмлухрин гьар са гектардай 145-150 центнер ципицIар кIватI хъийизва.

Чун шагьид хьайивал, “Аллахвердиев” КФХ-да хьиз, Эминхуьре кардик квай “ЧIереяр” ООО-да, Р.Гьамзатован, РД-дин хуьруьн майишатдин лайихлу работникар тир  А.Агъамирзоеван, М.Мегьамедован арендадин участокрани ципицIар кIватI хъувунин кIвалахар тешкиллувал аваз кьиле физва.

Районда “Зардиян” ООО гьар йисуз хъсан нетижаяр къазанмишзавай, экономика вилик тухуник еке пай кутазвай карханайрикай сад я. Магьсулрин ни­кIе­рихъ, салан участокрихъ, эхиримжи йисара кутунвай 30 гектар кIерецин багъларихъ галаз санал карханадихъ 110 гектар бегьердал атанвай уьзуьмлухарни ава. Анин директор Къазихан Азизовахъ, кьилин агроном, РД-дин хуьруьн майишатдин лайихлу работник Къурбан Магьмудовахъ, звеновод Фаина Рамазановадихъ галаз авур ихтилатрай малум хьайивал, карханада чкадин шартIара хъсан бегьер гузвай “Августин”, “Биянка”, “Рислинг”, “Ркацители” сортарин ципицIрин тегьенгар цанва. Алай вахтунда ципицIар кIватI хъувунал 2 бригада, 40-да­лай виниз­ рабочияр ва атIай ципицIар Дербентдин комбинатдиз дашмиш хъийизвай 2 машин машгъул я.

Къазихан Азизова чаз лагьайвал, сифтегьан 50 гектардай ципицIар кIватI хъувунва, гектардин бегьерлувили 120 центнер тешкилзава.

ЦипицIар атIунин кIвалахар кIвенкIвечи карханаяр тир “Гуьльгери-вацI”, “Дербент-Агро”, “Дере” карханайрани хъсан тешкиллувал аваз кьиле физва. Анрани уьзуьмлухрин гьар са гектардай 100-130 центнер ципицIар вахчузва. ЦипицIрин ширинвал 20 процентдилай виниз я.

Райондин хуьруьн майишатдин карханайрихъ, КФХ-рихъ ва арендаторрихъ 1650 гектар (абурукай 1339 га бе­гьердал атанвайбур) уьзуьмлухар ава. Алай йисуз рай­онда 12500 тонндилай тIимил тушиз (шазан 12320 тон­н­дин чкадал) ципицIар кIватI хъувун фикирдиз къачунва.

Районда ципицIар кIватI хъувунин кIвалахар давам жезва.

Хазран  Кьасумов