Са тIимил вахт идалай вилик Чечен Республикадин меркез Грозный шегьерда залан атлетикадай итимрин арада Россиядин чемпионат кьиле фена. Чи уьлкведин жуьреба-жуьре регионрай тир пагьливанри чпин устадвал къалурна.

Абурун арада спортдин и жуьредай машгьур чи спортсмен, вичин ери-бине Хив райондин ЗахитIрин хуьряй тир, алай вахтунда Москвадин ЦСКА-дин патай экъечIзавай Феликс Халибеговни авай. Россиядин чемпионвилин тIвар 5 сеферда къазанмишнавай, вич спортдин международный классдин мастер тир чи пагьливан нубатдин чемпионатда буьруьнждин медалдиз лайихлу хьана. Ада алай йисуз залан атлетикадай Россиядин Кубок патал кьиле фейи акъажунрани 3-чка кьуна. Ф.Халибегова Россиядин лайихлу тренерар тир Максим ва Артур Абдулмежидоврин гъилик устадвал хкажзава.

РикIел хкин: икьван чIавалди Ф.Халибегова 62,5 кг-дал къведалди заланвал авайбурун арада иштиракзавай. Са тIимил вахт идалай вилик чи ватандаш заланвилин цIийи (69 кг-дал къведалди) категориядал элячIнава. Инанмиш я хьи, и категориядани ада башчивал къазанмишдай вахтар яргъал алач.

Рагнеда Рамалданова