ЦIийи кIелунрин йис башламиш хьайила, Россиядин просвещенидин министерстводи кьил кутуналди, уьлкведин вири регионра мектебра аялриз чими хуьрекар гун тешкилнавай гьал ахтармишзава.
ИкI, аялар пулсуз чими тIуьнралди таъминарун авай гьал ахтармишунрин мураддалди Сулейман-Стальский райондиз кьиле РФ-дин просвещенидин министрдин заместитель Екатерина Толстикова авай махсус десте атана. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.
Ахтармишунрин кIвалах кьиле тухудай чIавуз федеральный делегациядихъ Сулейман-Стальский райондин кьил Нариман Абдулмуталибов, Дагъустандин образованидин ва илимдин министерстводин, МЧС-дин вилик-кьилик квай ксарни галай. Абур Сайтархуьруьн ООШ-да ва Кьасумхуьруьн 2-нумрадин СОШ-да хьана. Ахтармишдай чIавуз Екатерина Толстиковади райондин умуми образованидин идарайрин къурулушдиз къимет гана. Мектебрин регьберрихъ, педагогрихъ, аялрихъ ва абурун диде-бубайрихъ галаз суьгьбетарна, абурун тIалабунрихъ ва теклифрихъ яб акална. Просвещенидин министрдин заместителди къейд авурвал, райондин мектебрин сифтегьан классра кIелзавай аялар патал хъсан еридин ва кфетлу хуьрекар гун тешкилнава. “Аялар пайгар тIуьнралди таъминарун государство патал важиблу метлеб авай везифа я. Аялрин сагъламвал ва хатасузвал эвелимжи чкадал эцигнавайди я”, — малумарна Е.Толстиковади.
Ахтармишун кьиле тухудай чIавуз Сайтархуьруьн ООШ-дин кIвалахда тайин тир кимивилер авайдини дуьздал акъудна. Абур алай аямдин СанПиндин (санитариядинни эпидемиологиядин жигьетдай тайинарнавай къайдайрин) истемишунрал амалдай шартIар тахьунихъ галаз алакъалу я. И мектебда хуьрекар гьазурдай чка къулай шартIар авачирди я. Ина сифтегьан классра кIелзавай 13 аялдиз чими хуьрекар гун тешкилнава. Райондин чирвилер гудай идарайрин 90 процент столовояр, хуьрекар гьазурдай чкаяр девирдин истемишунрихъ галаз кьадайвал цIийи хъувунин игьтияж ава. Чими хуьрекар гун тешкилунин барадай четинвилер сифте нубатда чпин дараматар куьгьне хьанвай образованидин идарайрал гьалтзава.
Гьукуматдин делегация Кьасумхуьруьн цIийиз ачухай 2-нумрадин мектебдани хьана. Тайин мурадрихъ элкъуьрнавай федеральный программадал асаслу яз эцигнавай и мектебда чирвилер ва тербия гунин кIвалах ери аваз кьиле тухун патал вири шартIар тешкилнава. Школадин дараматдиз килигайдалай гуьгъуьниз Екатерина Толстиковади райондин руководстводиз республикадин образованидин ва илимдин министерстводихъ галаз санал кабинетар алай аямдин технический истемишунрихъ галаз кьадайвал, тамам дережада тадаракламишун меслят къалурна.
Мугьманвиле авай чIавуз Дагъустан Республикадин образованидин ва илимдин министрдин везифаяр тамамарзавай Тагьир Кудаева Кьасумхуьруьн 2-нумрадин СОШ-дин директор Мамед Велиевав цIийи мектеб патал чара авунвай автобусдин куьлегар вахкана.
РикIел хкин, мектеб патал автобус РД-дин образованидин ва илимдин министерстводи Сулейман-Стальский райондин кьил Нариман Абдулмуталибован тIалабуналди чара авурди я.
«Лезги газет»
