8-сентябрдиз — Дагъустандин халкьдин шаир Расул Гьамзатов дидедиз хьайи юкъуз — чи республикада “Лацу дурнаяр” йикъарин мярекатар ачух хьана. Иниз, адет хьанвайвал, Россиядин вири пипIерай багьа мугьманар атанвай.
“Лацу дурнаяр” неинки са чи республикадин агьалияр патал, гьакI вири Россиядин ва виридуьньядин халкьар патални важиблу сувариз элкъвенва. Адан асул мярекатар Махачкъалада, Тарки-Тау дагъда Расул Гьамзатован сурал цуьквер эцигунилай гатIунна. Анай багьа мугьманар ва шаирдин мукьва-кьилияр республикадин Урус драмтеатрдин патав шаирдиз хкажнавай памятникдал хтана, инални цуьквер эцигна.
И серенжемра РД-дин Халкьдин Собранидин Председатель Хизри Шихсаидова, РД-дин Гьукуматдин Председателдин Сад лагьай заместитель Анатолий Къарибова, депутатрин корпусдин векилри, РД-дин культурадин министр Зарема Бутаевади, Россиядин ва Дагъустандин писателрин еке дестеди, Расул Гьамзатовахъ галаз санал кIвалахай ксари, мукьва-кьилийри иштиракна.
Меркездин Ленинан Комсомолдин тIварунихъ галай паркуна, Азадвал патал женг чIугур аскердиз хкажнавай мемориалдин патав Гьамзатован йикъар — “Лацу дурнаяр” ачух хьуниз талукь митинг кьиле фена. Мярекат памятникдин патав цуьквер эцигунилай ва са декьикьада кIвачел акъвазна яс чIугунилай гатIунна.
Митинг РД-дин Гьукуматдин Председателдин Сад лагьай заместитель Анатолий Къарибова ачухна. Ада, атанвай мугьманар тебрик авунихъ галаз сад хьиз, Дагъустандин халкьдин шаир Расул Гьамзатова вири дуьньядин литературадик кутунвай паюнин кьетIен винизвал ва эбедивал къейдна. Жуьреба-жуьре муракабвилеризни килиг тавуна, и суварик атанвай вирибуруз ада сагърай лагьана. “И кар, — къейдна ораторди, — неинки чIехи шаирдиз ийизвай рикIяй къвезвай, гьакIни вири дявейра чпин чанар къурбанд авур аскерризни ийизвай гьуьрмет я. “Лацу дурнайрин” сувар дуьньядал ислягьвал, халкьарин дуствал, садвал, мергьяматлувал артух хьун паталди къачузвай кьетIен кам я”, — алава хъувуна А.Къарибова.
Адалай гуьгъуьниз митингдал, тебрикдин келимаяр лугьуз, чIехи шаир рикIел хкиз, Дагъустандин ва Россиядин писателрин Союздин векилар, РФ-дин жуьреба-жуьре регионрай атанвай мугьманар рахана. Абурукай гзафбуру шаирдин эсерар ва адаз бахшнавай чпин шиирар кIелна.
ЧIехи шаир чи патав гумачиз 17 йис алатнаватIани, адан бажарагъ чи рикIера, чи руьгьда, чан алай лацу дурнаяр хьиз, яшамиш жезва, дуьньяда ислягьвал таъминариз, лув гузва, уьмуьр кIани вирибурун рикIерик къалабулух кутазва, Чил, Ватан хуьнин аскер хьуниз эвер гузва.
“Лацу дурнайрин” суварик тамамарай гьар са мани, кIелай гьар са эсер Ватандин ЧIехи дяведин женгерин майданрай хтун тавур рухвайрин тIварарихъ лагьай реквием — ясдин мани хьиз я.
Нянин сятдин 6-даз республикадин шииратдин Театрда “Лацу дурнайриз” талукьарнавай чIехи межлис кьиле фена.
Расул Гьамзатован йикъар чи республикадин шегьерра ва районрани кьиле фена.
Чи мухбир
