ПФР-дин Дагъустан Республикада авай отделенидин къуллугъчийри (3 йисалди ва я 3 йисалай 16 йисал къведалди яшда авай) аялриз гузвай пулар икьван чIавалди къачун тавунвай агьалийри 30-сентябрдалди арзаяр гун лазим тирдал фикир желбзава.
РикIел хкин: алай йисан апрелдилай инихъ ПФР Россиядин Президент В.Путина 2020-йисан 7-апрелдиз кьабулай “Аялар авай хизанриз яшайишдин жигьетдай куьмек гунин алава серенжемрин гьакъиндай” 249-нумрадин указдин бинедаллаз 3 йисалай 16 йисалди яшда авай гьар са аялдиз са сеферда 10 агъзур манат гунив эгечIна. Гуьгъуьнлай и пулар хайи йикъалай 16 йис тамам жедалди яшда авай аялриз гунин къарарни кьабулнай. Кьвед лагьай сеферда арза гунин лазимвал авач. Са сеферда пул къачур хизанрин счётриз ам къвезва. Малум тирвал, 3 йисал къведалди яшда авай, яни 2017-йисан 1-апрелдилай 2020-йисан 30-июндалди дидедиз хьанвай аялриз 5 агъзур манатдин кьадарда аваз пул гузва. Дагъустандин Пенсийрин фондунай хабар гайивал, и пулар чи республикадин чIехи пай хизанри къачунва. Амма — вирида ваъ. Гьавиляй и пулар къачун тавунвай агьалийри арзаяр гуз тади авуна кIанда. И малумат 3 йисал къведалди яшда авай аялриз (5 агъзур манатдин кьадарда аваз) пуд вацра гузвай пуларизни талукьди я. Абур лагьайтIа, анжах пуд вацра (апрель, май, июнь) гуда.
Чна виликрайни са шумудра хабар гайивал, арзаяр “Госкъуллугъ” порталдин куьмекдалди анжах садавай — я дидедивай, я бубадивай, гьакIни хвавиле ва я рушвиле кьабулнавай дидедивай ва я бубадивай гуз жеда. Пул анжах РФ-дин мулкара яшамиш жезвай чи уьлкведин гражданриз гуда, аялдизни РФ-дин гражданство хьун герек я. Эгер хизанда 3-далай 16 йисалди яшда авай са шумуд аял аватIа, арзада гьар са аялдикай делилар къалурна кIан жеда.
«Лезги газет»
