25-августдиз Ахцегь райадминистрациядин активдин нубатдин совещание хьана.
— Алай вахтунда коронавирусдин инфекцияди кьил хкажуни чак къалабулух кутазва,- лагьана Осман Абдулкеримова. — Маскайринни бегьлейрин режим зайиф хъувуникди республикада ва райондани азарлуяр гзаф хьанва. 25-августдин делилралди, районда коронавирусдик — 128, пневмониядик — 85 ва ОРВИ-дик начагъ 208 кас азарлуяр ава. Абурукай 85 ЦРБ-да ва 336 кас амбулаторный жуьреда сагъар хъийизва…
Школаяр кIелунин цIийи йисаз гьазуруникай рахай райадминистрациядин кьилин заместитель Вадим Агъасиева къейд авурвал, райондин вири школаяр 1-сентябрдиз аялар кьабулиз гьазур я.
“Аялар чими тIуьнралди таъминарун, коронавирусдин вилик пад кьун важиблу я. Роспотребнадзордин делилралди, бязи школайрин пищеблокар госстандартдин истемишунрив кьазвач. Къалурнавай кимивилер арадай ахкъудун ва аялар тIугъвалдикай хуьдай серенжемар кьабулун патал махсус комиссия тешкилнава. 24-августдиз чун РУО-дин начальник Алмас Гьажиев ва гигиенадинни эпидемиологиядин центрадин кьилин духтур Имран Къазихановни галаз школайриз фена, анра кIелунин цIийи йисаз гьазур хьунин, кьилди къачуртIа, пищеблокар авай гьал ва 1-сентябрдилай сифтегьан классрин аялар пулсуздаказ чими тIуьнралди таъминариз хьунин месэлаяр ахтармишна”, — лагьана В.Агъасиева.
Мярекатдал налогар кIватIуниз талукь месэлани веревирдна. И жигьетдай районда авай гьаларикай администрациядин экономикадин отделдин начальник Ф.Агьмедовади ихтилатна.
Дашдемир Шерифалиев
